Kasar Indiya ta jinkirta shirin tura tawagar kasuwanci zuwa birnin Washington a wannan mako, musamman saboda rashin tabbas bayan da kotun kolin Amurka ta yi watsi da harajin da shugaba Donald Trump ya dora mata, kamar yadda wata majiya daga ma’aikatar kasuwancin ta bayyana a ranar Lahadi din da ta gabata.
Wannan shi ne ainihin martani na farko a tsakanin ƙasashen Asiya game da shawarar. Hakan ya biyo bayan matakin da Trump ya dauka a ranar Asabar da ta gabata na sanya harajin wucin gadi na kashi 15%, wanda doka ta amince da shi, kan kayayyakin da Amurka ke shigowa da su daga dukkan kasashen duniya, biyo bayan kin amincewa da kotun.
“An dauki matakin dage ziyarar ne bayan tattaunawa tsakanin jami’an kasashen biyu,” in ji majiyar wadda ta nemi a sakaya sunanta.
“Ba a yanke wani sabon ranar ziyarar ba.”
KU KARANTA KUMA: Kotun Koli ta Amurka ta yi watsi da harajin Trump na Duniya
Majiyar ta kara da cewa jinkirin ya samo asali ne daga rashin tabbas game da jadawalin kuɗin fito bayan hukuncin na ranar Juma’a da ta gabata.
Tawagar za ta tashi ne a ranar Lahadin da ta gabata don tattaunawa don kammala yarjejeniyar kasuwanci ta wucin gadi, bayan da kasashen biyu suka amince da wani tsari na Washington don rage harajin na kashi 25% kan wasu kayayyakin da Indiya ke fitarwa da ke da alaƙa da siyan mai na Rasha na New Delhi.
Za a rage harajin Amurka kan kayayyakin Indiya zuwa kashi 18 cikin 100, yayin da Indiya ta amince da sayen kayayyakin Amurka da darajarsu ta kai dala biliyan 500 cikin shekaru biyar, da suka hada da makamashi da jiragen sama da sassa, karafa masu daraja da kayayyakin fasaha.
Jam’iyyar adawa ta Congress na Indiya ta yi kira da a dakatar da yarjejeniyar ta wucin gadi, tare da yin kira da a sake tattaunawa tare da yin tambaya kan shawarar Firayim Minista Narendra Modi na fitar da sanarwar hadin gwiwa a gaban hukuncin kotun.
A ranar Asabar da ta gabata ma’aikatar cinikayya ta Indiya ta ce tana nazarin tasirin hukuncin da kuma sanarwar Amurka daga baya.
Ministan cinikayya Piyush Goyal ya ce yarjejeniyar ta wucin gadi za ta fara aiki a watan Afrilu, bayan an warware wasu fitattun batutuwa yayin ziyarar da tawagar ta kai Washington.
REUTERS/Aisha. Yahaya, Lagos
