Ku Shirya Don Aikin Da Ke Gaba; Kakaki Abbas Ya Fadawa Ma’aikatan Sa

Kakakin majalisar wakilai, Hon. Tajudeen Abbas (Ph.D.), ya umurci ma’aikatan da ke ofishinsa da su jajirce tare da sabunta musu kuzarin aikin da ke gabansu.

Shugaban majalisar Abbas ya ce ma’aikatan ofishin shugaban majalisar su ne jigon nasararsa, don haka akwai bukatar su ba shi cikakken goyon baya da hadin kai don samun nasara.

Da yake magana a lokacin da ya gudanar da taron nasa na farko da daukacin ma’aikatan ofishinsa da ke majalisar dokokin kasar, shugaban majalisar ya ce kofarsa za ta bude wa kowa.

“Ina jin daɗin kasancewa tare da ku a yau. Wannan rana ce mai tarihi a gare ni domin na fara da ma’aikatan ofishina. Ina gode wa daraktan saboda goyon bayanta a cikin makon da ya gabata, tun fitowata. Ina kuma gode wa magatakarda na majalisar bisa goyon bayansa. Ina kira gare ku da ku ba ni goyon baya. Idan kun ba ni goyon baya, kuna tallafa wa cibiya, kuma a tsawaita, kuna tallafawa ƙasar.

“Ni mutum ne mai tsari, amma ina da kyakkyawan fata. Ina tabbatar muku cewa zan zama jagora mai sauraro. Kofofina a bude suke gare ku duka. Ina roƙon ku da ku sabunta ƙarfin ku don aikin da ke gaba. Duk lokacin da kuke da wata matsala, ku zo wurina, zan saurare ku.” Hon Abbas yace.

Tun da farko, magatakardar majalisar, Dokta Yahaya Dan-Zaria, ya shawarci ma’aikatan da ke ofishin shugaban majalisar da su hada kawunansu wuri daya, su kuma yi aiki don samun nasarar dan kasa mai lamba 4.

“Dukkanmu mabuɗin ne ga nasarar shugaban majalisar, don haka dole ne mu yi duk abin da za mu yi don yin aiki tare don samun nasararsa,” in ji shi.

Har ila yau, shugabar sakatariyar ofishin kakakin majalisar, Hajiya Nana Asein, darakta a majalisar ta taya shugaban majalisar murnar nasarar da ya samu, ta kuma ce a shirye suke su yi aiki da shi domin cimma nasarar da aka dora masa.

Ta ce akwai sassa daban-daban a ofishin shugaban majalisar, wadanda dukkansu ke aiki tare cikin jituwa domin samun nasarar shugaban majalisar da hukumar.