Gwamnan Jihar Kano, Alhaji Abba Kabir Yusuf ya bayyana aniyarsa ta inganta harkokin masana’antu, makamashi, tsaro, da kuma sauyin yanayi a Jihar.
Gwamna Abba ya bayyana haka ne a yayin ziyarar ban girma da mahalarta Cibiyar Nazarin Manufofi da Dabaru ta Kasa NIPSS, Kuru suka kai masa a Kano a wani bangare na rangadin karatu.
Ya ce gwamnatin jihar na dakon rahoton bincikensu, kuma ya ba su tabbacin cewa za a aiwatar da sakamakon binciken da shawarwarin da mahalarta taron suka bayar domin bunkasa masana’antu, makamashi, tsaro, da sauyin yanayi a jihar.
Gwamna Abba ya taya mahalarta babban kwas (SEC) 45 murnar shiga cikin shirin.
Mataimakinsa, Kwamared Aminu Abdussalam Gwarzo ne ya gabatar da shi.
Darakta Janar na NIPSS, Farfesa Ayo Omotayo, wanda ya jagoranci tawagar ya ce babban makasudin zuwa Kano shi ne tattaunawa da manyan masu ruwa da tsaki a harkar masana’antu.
“Kungiyar na neman yin nazari tare da gano kalubalen da masana’antu ke fuskanta a Jihar Kano, musamman a fannonin wutar lantarki da sauyin yanayi, tare da mai da hankali wajen fahimtar tasirinsu ga rayuwar talakawa. Manufar su ita ce samar da dabarun shiga tsakani yadda ya kamata,” in ji DG NIPSS.
Ya kuma nuna jin dadinsa ga Gwamna Abba bisa kyakkyawar tarba da aka yi masa.
A cikin sanarwar da sakataren yada labarai na mataimakin gwamnan jihar, sakataren gwamnatin jihar Kano Dr. Baffa Abdullahi Bichi, ya mika godiyarsa ga hukumar NIPSS da ta zabi jihar Kano a matsayin daya daga cikin jihohi bakwai da suka yi rangadin karatu.
Ya kuma tabbatar wa da tawagar cewa gwamnatin jihar za ta ba da duk wani tallafi da kayan aiki don saukaka binciken su, tare da tabbatar da samar da muhimman abubuwan da za su iya aiwatarwa a cikin jihar.
Kwanturolan hukumar shige da fice kuma ‘yar takarar SEC 45, Franka Nwaneka, ta bayyana jin dadin ta ga gwamnatin jihar Kano da al’ummarta da suka yi masa kyakkyawar tarba.
Ya yi alkawarin cewa ‘yan kwas din za su hada kai don ganin cewa yawon shakatawa ya samar da sakamako mai kyau.
Leave a Reply