Babu Umarnin Shiga Tsakani A Jamhuriyar Nijar – Sojojin Najeriya

Rundunar Sojin Najeriya ta bayyana karara cewa ba ta samu wani umarni daga hukumar da ta dace na fara daukar matakin soji ba, a kan gwamnatin mulkin soja a Jamhuriyar Nijar.

Rundunar sojin Najeriya ta ce ba za ta iya ci gaba da gudanar da duk wani aiki a kowace kasa daga cikin mambobin kungiyar ECOWAS ba tare da izini daga hukumomin shugabannin kasashe da gwamnatoci ba.

Wata sanarwa da mukaddashin daraktan yada labaran tsaro, Birgediya Janar Tukur Gusau ya fitar ta ce an ja hankalin rundunar sojin Najeriya kan wani rahoton da aka wallafa ta yanar gizo da ke nuna cewa rundunar sojin Najeriya na hada dakarunta domin daukar matakin soji a yankin. Jamhuriyar Nijar.

A wani jawabin maida martani, Hedkwatar Tsaro ta nuna cewa yanzu ba labari ba ne cewa wasu sojojin Jamhuriyar Nijar sun kwace mulki daga hannun zababbiyar gwamnati ta hanyar da ba ta dace ba. Kuma dangane da wannan karyewar gwamnati ba bisa ka’ida ba, shugabannin ECOWAS sun gana, inda aka cimma wasu zabuka kan yadda za a shiga cikin rikicin.

Rundunar sojin Najeriya ta fayyace cewa zabin soja shi ne zabi na karshe da za a dauka idan duk wani zabin ya kasa sauya al’amura tare da mayar da gwamnatin Jamhuriyar Nijar kan tsarin mulkin kasar.

Yanzu haka dai kwamitin hafsan hafsoshin tsaro na kungiyar ECOWAS na gudanar da wani taro na musamman a birnin tarayya Abuja domin tattaunawa kan al’amuran siyasa a Jamhuriyar Nijar tare da mika shirinsu ga kwamitin shugabannin kasashen kungiyar ECOWAS domin tantancewa.