Majalisar Wakilai Za Ta Gudanar Da Budaddiyar Majalisa – Mataimakin Kakakin Majalisar

Majalisar wakilai ta 10 ta ce babban ajandar ta shi ne gudanar da budaddiyar majalisar da ta mayar da hankali kan gaskiya da rikon amana don samar da ingantacciyar kasa da wadata a Najeriya.

Mataimakin shugaban kwamitin majalisar kan harkokin yada labarai da hulda da jama’a, Philip Agbese ne ya bayyana hakan ta wata sanarwa a Abuja ranar Asabar.

Dan majalisar mai wakiltar mazabar Ado/Okpokwu/Ogbadibo a jihar Binuwai, ya ce tuni shugabannin majalisar a karkashin kakakin majalisar Tajudeen Abbas suka sanya hannu a kai domin cimma wata manufa ta kasa.

Ya kara da cewa majalisar ta 10 ta mayar da hankali ne wajen ganin ta cika alkawarin da ta yi wa ‘yan Nijeriya daidaiku da kuma a dunkule a matsayin majalisa.

Ya lissafta ’yancin tattalin arziki, yanayin kasuwanci mai natsuwa, gudanar da al’amuran mulki, yancin kai, jarin zamantakewa, aminci, tsaro, ilimi da lafiya a matsayin wuraren zama na majalisar.

Agbese ya ce a dalilin haka ne shugabanni suka tsara wani shiri na tallafawa ‘yan kasa da nufin inganta jin dadin ‘yan Najeriya.

“Majalisa ta 10 tana duba hanyoyi da dama don inganta doka da kuma kusantar da mulki ga jama’a.

“Daga cikin dabarun da aka yi la’akari da su sun hada da yin amfani da fasaha da kuma tarukan da aka saba yi a zauren gari.

“Akwai wani sabon salon kishin kasa, jajircewa, da sadaukar da kai ga al’amuran Najeriya dangane da ‘yan majalisar dokokin kasar,” in ji shi.

Don haka Agbese ya bukaci ‘yan Najeriya da su ci gaba da nuna goyon bayansu ga majalisar a yunkurinta na ganin an kyautata rayuwar kowa, yana mai tabbatar da cewa nan da wani lokaci mai nisa al’ummar kasar za su fuskanci wani sabon salo na rayuwa.

NAN/Ladan Nasidi.