Hukumar Kula da Kananan Yara ta Majalisar Dinkin Duniya (UNICEF) ta yi Allah wadai da yawan yaran da aka kashe a Gaza, inda Jami’ai suka ce harin bam da Isra’ila ta kai ya kashe kananan yara sama da 2,000.
Rahoton da ke cewa an kashe yara 2,360 cikin kasa da makwanni uku, UNICEF ta yi kira da a tsagaita bude wuta cikin gaggawa da kuma ci gaba da kai dauki ba tare da wani cikas ba na taimakon agaji.
UNICEF ta kara da cewa, an kuma jikkata wasu yara 5,364 a Gaza a hare-haren da aka kai.
Sama da yara 400 ne rahotanni suka ce ko dai ana kashe su ko kuma suka jikkata a kowace rana a yankin Falasdinawa da aka yi wa kawanya, in ji sanarwar.
Yara sun kai kusan kashi 50 na al’ummar Gaza kusan miliyan 2.3.
“Halin da ake ciki a Zirin Gaza wani tabo ne a kan lamirinmu na gamayya. Adadin mace-macen yara da jikkatar yara na dada tashi,” in ji Adele Khodr, darektan UNICEF na yankin Gabas ta Tsakiya da Arewacin Afirka.
“Mafi firgita shi ne yadda idan ba a sassauta tashin hankali ba, kuma idan ba a ba da izinin agajin jin kai da suka hada da abinci, ruwa, magunguna da man fetur ba, adadin wadanda ke mutuwa a kullum zai ci gaba da karuwa.”
Kusan kowane yaro a Zirin Gaza yana fuskantar matsaloli masu cike da damuwa da rauni, wanda ke fama da barna mai yawa, hare-haren da ba a saba gani ba, da ƙaura, da matsanancin ƙarancin kayan masarufi na yau da kullun kamar abinci, ruwa, da magunguna, in ji UNICEF.
ALJAZEERA/ Ladan Nasidi.
Leave a Reply