Serbia: ‘Yan Sanda Sun Harba Hayaki Mai Sa Hawaye Yayin Da Aka Gudanar Da Zanga-zanga Kan Zabe
‘Yan sandan kwantar da tarzoma a Serbia sun harba barkonon tsohuwa kan magoya bayan ‘yan adawar da ke neman a soke zaben da aka yi fama da shi sakamakon zargin magudi.
Daruruwan masu zanga-zangar ne suka yi yunkurin kutsawa fadar gwamnatin Belgrade a yammacin Lahadin da ta gabata a yayin zanga-zangar nuna adawa da sakamakon zaben ‘yan majalisar dokoki da na kananan hukumomi da aka gudanar a ranar 17 ga watan Disamba, wanda masu sa ido na kasa da kasa suka ce an tafka magudi ta hanyar sayen kuri’u, da caccakar kuri’u da kuma tasirin da bai dace ba na shugaba Aleksandar Vucic.
Magoya bayan ‘yan adawa, wasu na rera taken, “Barawo Vucic” da “Vucic ne Putin”, sun yi amfani da tutoci da duwatsu wajen karya tagogi a lokacin da suke kokarin kutsawa cikin ginin babban birnin kasar amma ‘yan sandan kwantar da tarzoma sun dakile su.
An mayar da jam’iyyar Vucic mai mulki ta Serbian Progressive Party (SNS) kan karagar mulki da rinjayen ‘yan majalisa bayan da ta samu kusan kashi 47 na kuri’un da aka kada, a cewar sakamakon farko da hukumomin zabe suka sanar.
Kawancen ‘yan adawa mai tsatsauran ra’ayi Serbia Against Violence ta samu kashi 23.56 na kuri’un da aka kada, sai jam’iyyar Socialist Party ta Serbia da kashi 6.56 bisa 100 a cewar hukumomin zabe.
Serbia Against Violence dai ta yi ikirarin cewa ita ce ta lashe zaben, musamman a birnin Belgrade, inda aka samu rahotannin cewa an dauki wadanda ba mazauna wurin ba domin kada kuri’a.
A cikin wata wasika da ta aike a farkon wannan makon, Serbia Against Violence ta shaida wa cibiyoyi da jami’ai da kasashe mambobin kungiyar Tarayyar Turai cewa ba za ta amince da sakamakon ba, ta kuma yi kira ga kungiyar da ta yi hakan tare da fara gudanar da bincike.
“’Yan sanda suna ko’ina, su ma a kan rufin gidaje. A bayyane yake cewa ba sa son amincewa da sakamakon zaben,” in ji shugaban Serbia Against Violence Nebojsa Zelenovic. “Za mu ci gaba da yakinmu.”
Vucic ya yi watsi da kiraye-kirayen ‘yan adawa na sake gudanar da zaben, yana mai mai da martani na rashin bin ka’ida a matsayin “karya”.
A cikin wani jawabi da gidan talabijin na Pink TV mai goyon bayan gwamnati ya watsa a ranar Lahadin da ta gabata, Vucic ya ce zanga-zangar “ba juyin juya hali ba ne” kuma wadanda ke neman tada zaune tsaye a jihar ba za su yi nasara ba.
Vucic ya ce “Wannan wani yunƙuri ne na cin zarafi na mamaye cibiyoyin gwamnati na Jamhuriyar Serbia,” in ji Vucic, yayin da yake mai da’awar cewa “an shirya komai tun da wuri” tare da taimako daga ketare.
Shugaban na Serbia ya ce an kama mutane sama da 35 kuma za su biyo baya.
Vucic ya ce “Babu wanda ke da ‘yancin lalata gidanmu, ya lalata dukiyoyin kasarmu da ‘yan kasarmu, balle kuma ya jawo munanan raunuka ga jami’an ‘yan sandanmu.”
ALJAZEERA/Ladan Nasidi.
