A farkon kwanaki biyu na muhawarar shari’a a kotun kasa da kasa, ministan shari’a na Afirka ta Kudu ya gabatar da karar kasarsa kan Isra’ila da suke zargi da kisan kare dangi a yakin da ta ke a Gaza.
Ministan shari’a Ronald Lamola ya fada a ranar Alhamis cewa martanin da Isra’ila ta mayar game da harin na ranar 7 ga Oktoba 2023 ya ketare iyaka “kuma ya haifar da keta yarjejeniya.”
Afirka ta Kudu ta kaddamar da shari’arta a babban kotun Majalisar Dinkin Duniya a watan Nuwamba kuma ta bukaci kotun ICJ da ta ba da umarnin dakatar da yakin sojin Isra’ila a Gaza.
Shari’ar dai ta ta’allaka ne kan yarjejeniyar kisan kare dangi ta 1948, wadda Afrika ta Kudu da Isra’ila suka rattaba hannu a kai.
Lauyan Afirka ta Kudu Adila Hassim ya yi zargin cewa halin Isra’ila ya saba wa labarin 2A, 2B, 2C, da 2D na yarjejeniyar.
“Aikin kisan kiyashi na farko da Isra’ila ta aikata shi ne kisan gillar da aka yi wa Falasdinawa a Gaza, wanda ya sabawa Yarjejeniyar kisan kiyashi,” in ji ta.
Afirka ta Kudu ta yi matukar suka ga ayyukan sojin Isra’ila a Gaza tun lokacin da aka fara yakin, inda a watan Nuwamba ‘yan majalisar suka kada kuri’a kan dakatar da huldar diflomasiyya har sai an amince da tsagaita bude wuta.
Harin na Isra’ila ya yi sanadiyar mutuwar Falasdinawa sama da 23,200, a cewar ma’aikatar lafiya ta Hamas.
Kimanin kashi biyu bisa uku na wadanda aka kashe mata ne da kananan yara.
africanews/Ladan Nasidi.
