Koriya ta Arewa ta aike da kimanin kwantena 6,700 dauke da miliyoyin alburusai zuwa Rasha tun watan Satumba don musanya abinci da sassa da kayan da ake kera makamai, in ji jami’ai.
Ministan tsaron Koriya ta Kudu Shin Wonsik ya shaidawa manema labarai cewa kwantenan na iya daukar harsashi sama da miliyan uku 152mm ko kuma zagaye 500,000 122mm.
“Zai iya kasancewa gauraya biyun, kuma za ka iya cewa an aika a kalla harsashi miliyan da dama,” in ji Shin, a cewar kamfanin dillancin labarai na Yonhap.
Ministan bai yi karin haske ba kan madogararsa.
Ya ce daruruwan masana’antar makaman Koriya ta Arewa suna aiki da kusan kashi 30 cikin dari na karfinsu saboda karancin kayan aiki da wutar lantarki, amma wadanda ke kera harsashi ga Rasha suna aiki “da sauri”.
Ya ce, a matsayin mayar da martani ga makaman, Rasha ta ba wa Koriya ta Arewa abinci, albarkatun kasa da sassan da ake amfani da su wajen kera makaman.
“Da alama abinci shine mafi girman kaso [na jigilar kayayyaki daga Rasha], wanda aka yi imanin ya daidaita farashin abinci a Koriya ta Arewa, tare da wasu abubuwan bukatu kuma sun hada da su,” in ji Shin.
Ya kara da cewa, yawan kwantenan da ake jigilar su daga Rasha zuwa Koriya ta Arewa ya kai kusan kashi 30 cikin dari fiye da wadanda aka yi jigilar su daga Pyongyang zuwa Moscow a daidai wannan lokacin.
Dangantakar Rasha da Koriya ta Arewa ta kara kusantar juna a ‘yan shekarun nan.
A watan Satumba, shugaban Koriya ta Arewa Kim Jong Un ya je Rasha domin ganawa da shugaba Vladimir Putin, inda suka tattauna kan hadin gwiwar soji da yiwuwar taimakon Rasha ga shirin tauraron dan adam na Pyongyang.
ALJAZEERA/ Ladan Nasidi.
