Ministan babban birnin tarayya Nyesom Wike ya yaba da nadin Farfesa Chituru Godwill Orluwene a matsayin babban daraktan kula da lafiya na asibitin koyarwa na jami’ar Fatakwal (UPTH).
Wike wanda ya kuma nuna jin dadinsa ga shugaban kasa Bola Ahmed Tinubu bisa wannan nadin ya ce “Shugaban ya ci gaba da nuna kaunarsa ga jihar Ribas da al’ummarta kuma za mu ci gaba da mara masa baya domin ya ci gaba da gudanar da mulkinsa na gari.”
A cikin wata sanarwa a ranar Talata ta hannun babban mai taimaka masa na musamman kan harkokin sadarwar jama’a da kafafen yada labarai Lere Olayinka ministan ya bayyana nadin Farfesa Orluwene a matsayin “Shugaba Tinubu ya sake sanya wani zagaye a cikin rami mai zagaye” inda ya bukace shi da ya yi amfani da kwarewarsa don inganta yanayin Asibitin Koyarwa daidai da ajandar sabunta bege na Shugaba Tinubu.
Ya kuma godewa Ministan Lafiya da Jin Dadin Jama’a Muhammad Ali Pate saboda bayar da shawarar nadin Farfesa Orluwene.
“Ina taya Farfesa Orluwene murna kan wannan nadin kuma ina rokonsa da ya yi aiki tare da duk masu ruwa da tsaki a cikin UPTH don tabbatar da ci gaba da samar da ingantattun ayyukan kiwon lafiya ga ‘yan Najeriya” in ji Wike.
