Mali ta bukaci dakarun wanzar da zaman lafiya na Majalisar Dinkin Duniya su fice

Ministan harkokin wajen Mali ya yi kira ga Majalisar Dinkin Duniya da ta janye dakarunta na wanzar da zaman lafiya daga kasarsa ba tare da bata lokaci ba.

Abdoulaye Diop a lokacin da yake jawabi ga Kwamitin Sulhu na Majalisar Dinkin Duniya, ya zargi rundunar, MINUSMA, da “zama wani bangare na matsalar da ke ruruta wutar rikici tsakanin al’umma.”

Ya ce, “MINUSMA tana da dakaru sama da 13,000, aikinta na tsawon shekaru goma ya kasa dakatar da yaduwar ta’addancin jihadi.”

A halin da ake ciki yanzu, sojojin haya na Wagner na Rasha suna taimakawa shugabannin sojojin Mali.

Jami’an kasashen yamma sun zargi Wagner da take hakkin bil’adama a Ukraine da wasu sassan Afirka, kuma a watan da ya gabata Amurka ta sanar da kakaba takunkumi kan Ivan Maslov, wanda ta bayyana a matsayin babban jami’in Wagner a Mali.

Sai dai Wagner bai ce uffan ba game da zargin da kasashen yamma ke yi, kuma har yanzu ba a boye ayyukanta a Mali da sauran sassan Afirka ba.

Sukar da minista Diop ya yi wa MINUSMA ya biyo bayan kin amincewar da Mali ta yi tun farko kan tsoma bakin Faransa a Mali.

Kawancen da aka yi da kasar Faransa, tsohuwar mulkin mallaka, ya ruguje a bara.

Mista Diop ya yi magana game da “rikicin amincewa tsakanin hukumomin Mali da MINUSMA” ya kuma ce, “Gwamnatin Mali ta nemi janyewar ba tare da bata lokaci ba.”

Wa’adin MINUSMA zai kare ne a ranar 29 ga watan Yuni, amma babban jami’in MDD Antonio Guterres ya ba da shawarar cewa a sake fasalin aikin domin mai da hankali kan wasu iyakantattun abubuwan da suka sa a gaba.

Da aka tambaye shi game da kalaman Mista Diop a ranar Juma’a manzon Majalisar Dinkin Duniya na musamman a Mali, El-Ghassim Wane, ya ce “Mun tsaya a yi mana ja-gora da duk wani matakin da kwamitin sulhu zai dauka”.

Ya kara da cewa ba tare da izinin kasar mai masaukin baki ba “aiki a wata kasa zai zama babban kalubale, idan ba zai yiwu ba.”

A halin yanzu dai Majalisar Dinkin Duniya ta sanya jerin gwanon sojoji daga kasashen Chadi, Bangladesh, da Masar a matsayin wadanda suka fi yawa a cikin rundunar