Jihar Nasarawa Ta Nemi Kawo Karshen Zubar Da Shara Ba Gaira Ba Dalili

Gwamnatin jihar Nasarawa ta sha alwashin kawo karshen zubar da shara ba gaira ba dalili a fadin kananan hukumomi 13 na jihar. Don cimma wannan buri, gwamnatin jihar ta samar da wasu wuraren zubar da shara da kuma share magudanun ruwa a fadin kananan hukumomi 13 na jihar domin kaucewa barkewar cututtuka da ambaliyar ruwa.

KU KARANTA: Ambaliyar ruwa: FEMA ta yi gargadi game da zubar da sharar gida ba gaira ba dalili

Babban Sakataren Ma’aikatar Muhalli da Albarkatun Kasa ta Jihar, Malam Garba Mohammed ne ya bayyana haka a lokacin da yake zantawa da ‘yan jarida a Lafiya bayan aikin tsaftace muhalli na wannan watan.

Sakatare na dindindin wanda ya nuna rashin jin dadin shi da gidajen da ke zubar da shara a magudanun ruwa da ke haifar da ambaliya, ya kara da cewa ma’aikatar za ta fara aikin share magudanun ruwa.

Ya ce a yanzu haka ma’aikatar za ta dauki nauyin wayar da kan masu gidaje da kantuna kan bukatar tsaftace muhallinsu inda ya ce za su dauki nauyin duk wani toshewar da ke cikin harabar su.

A cewar shi, idan aka yi la’akari da yadda ambaliyar ruwa ke barna kuma yana ci gaba da addabar al’umma a jihohi da dama ciki har da wasu sassan jihar Nasarawa, ma’aikatar ba za ta bari wani ya toshe hanyoyin ruwa ba.

Sakatare na dindindin ya kara da cewa “Lokacin da kuka toshe hanyoyin ruwa da hana ruwa gudu, kuna gayyatar matsaloli, saboda duk yadda ruwa zai wuce shine yafi kyau. Mun kyale wadanda ke da izini daga hukumomin da abin ya shafa da wadanda ke kan muhimman ayyuka su wuce, kuma su zagaya yayin aikin,” ya kara da cewa.

Vanguard/Ladan Nasidi.