Jihar Sokoto Ta Nemi Tallafin Lafiya Daga Gwamnatin Switzerland

Gwamna Ahmed Aliyu na jihar Sokoto ya nemi goyon baya da hadin gwiwar hukumomin kasar Switzerland a fannonin ilimi, samar da lafiya da kuma ci gaban bil’adama. Aliyu ya yi wannan roko ne a lokacin da ya karbi bakuncin jakadan kasar Switzerland a Najeriya, Nicolas Lang, a wata ziyarar ban girma da suka kai masa. Gwamnan ya roki tallafin da kasar Switzerland ke baiwa jihar Sokoto a bangaren yaran da basu zuwa makaranta, sansanonin ‘yan gudun hijira, da kuma marasa galihu.

“Dukkan wadannan kungiyoyi suna bukatar goyon bayanku sosai a daidai lokacin da kuke ba kasarmu Najeriya. A ko da yaushe gwamnatina a shirye take ta hada kai da duk wata kasa ko wata kungiya da ke kokarin inganta rayuwar al’ummarmu,” ya kara da cewa.

KU KARANTA KUMA: Rikicin jinsi: Rukunin ayyukan matan sokoto kan hadin gwiwa

Ya kuma mika godiyarsa ga Manzo bisa ziyarar tare da ba shi tabbacin shirin gwamnatinsa na yin hadin gwiwa da kasarsa domin amfanin jihar baki daya.

Tun da farko, Lang, wanda sakataren yada labarai na ayyukan jin kai da ci gaba, Nicholas Martins, ya wakilta, ya shaida wa gwamnan cewa kasar Switzerland ta fara gudanar da ayyukan jin kai tare da hadin gwiwar gwamnatin Najeriya tun daga shekarar 2014.

Ya ce sun mayar da hankali sosai kan yankin Arewa maso Gabashin Najeriya, wajen mayar da martani ga wadanda rikicin Boko Haram ya shafa.

“Amma, ba mu makance da cewa akwai kuma bukatu na jin kai a yankin Arewa maso Yamma na kasar nan da ya taso daga rikicin ‘yan fashi. Muna ba da shawarwari a matakinmu a nan hedkwatarmu don ba mu damar wuce yankin da aka fi mayar da hankali a kai, wanda shi ne yankin Arewa maso Gabas,” ya kara da cewa.

Lang ya kuma kara da cewa, sun samu damar gudanar da wani aiki a Sokoto, tare da hadin gwiwar wata kungiya mai zaman kanta ta Action Against Hunger da za ta gudanar da aikin na shekara daya a kananan hukumomin Bodinga da Tambuwal. Aikin, in ji shi, yana mai da hankali ne kan abinci mai gina jiki, ruwa, da tsaftar muhalli, wanda ya ce shi ne aikin farko na Switzerland a jihar.

Ya kuma yabawa gwamnan bisa irin himma da jajircewa da aka nuna a cikin hadin gwiwa da kasarsa don magance matsalolin jin kai.

Punch/L.N