Duniya ta yi maraba da 2024 tare da haɗakar biki da tunani mai ban sha’awa.
Sydney ta haskaka a karkashin ruwan azurfa da wasan wuta na zinare na bikin cika shekaru 50 da kafuwar Opera House, yayin da yanayin Gaza ya kasance mara dadi, inda mazauna garin suka fi nuna damuwa da rayuwa.
A Turai, Sarauniyar Denmark Margrethe II ta sanar da murabus din ta bayan fiye da rabin karni a kan karagar mulki.
Ga yadda wurare da mutane a duniya ke bankwana da 2023 kuma suna maraba da Sabuwar Shekara.
ABSTRALIYA
Sydney ta yaba da 2024 tare da nunin wasan wuta mai ban sha’awa wanda ke nuna nau’ikan fasaha na azurfa da zinare don bikin cika shekaru 50 na shahararren Opera House.
GAZA
Mutanen Gaza ba su da wani fata cewa 2024 zai kawo sauki sosai bayan makonni 12 na yakin Isra’ila na kawar da Hamas. A Rafah da ke kan iyakar Gaza da Masar, wanda ya zama wuri mafi girma ga Falasdinawa da ke tserewa daga wasu sassan yankin, mutane sun fi shagaltuwa a ranar Lahadin da ta gabata da kokarin neman matsuguni, abinci da ruwa fiye da tunanin sabuwar shekara.
“A cikin 2024 ina fatan komawa cikin tarkacen gida na, in kafa tanti in zauna a can,” in ji Abu Abdullah al-Agha, wani Bafalasdine mai matsakaicin ra’ayi wanda aka lalata gidan shi a Khan Younis kuma ya rasa wata yarinya dan uwa a harin da Isra’ila ta kai ta sama.
DENMARK
Sarauniyar kasar Denmark Margrethe ta biyu ta yi amfani da jawabin ta na sabuwar shekara a ranar Lahadin da ta gabata inda ta sanar da cewa za ta yi murabus a ranar 14 ga watan Janairu bayan ta shafe shekaru 52 a kan karagar mulki kuma babban danta, Yarima mai jiran gado Frederik ne zai gaje shi.
RASHA
Shugaban kasar Rasha Vladimir Putin da ke fuskantar zabe a watan Maris, ya yi tsokaci ne kawai a jawabin shi na sabuwar shekara a ranar Lahadin da ta gabata kan yakin da ya ke yi a Yukrain, inda ya yaba wa sojojin shi a matsayin jarumai amma galibi yana jaddada hadin kai da kuma azama daya.
YUKRAIN
A jawabin sabuwar shekara, Shugaba Volodymyr Zelenskiy ya ce Ukraine ta kara karfi wajen shawo kan matsaloli masu tsanani ganin yakin da ake yi da Rasha ya kai kusan shekaru biyu. Ya ambaci kalmar “yaƙi” sau 14 a cikin wani jawabi na mintuna 20.
SIN
Shugaban kasar Sin Xi Jinping, wanda yake jawabi a jiya Lahadi a wani jawabi da aka watsa ta gidan talbijin don murnar sabuwar shekara, ya ce kasar za ta karfafa tare da inganta kyakkyawan yanayin farfadowar tattalin arzikinta a shekarar 2024, da kuma dorewar ci gaban tattalin arziki na dogon lokaci tare da yin gyare-gyare mai zurfi.
TAIWAN
Shugaba Tsai Ing-wen ta ce wanzar da zaman lafiya da kwanciyar hankali a mashigin tekun Taiwan nauyi ne na bangarorin biyu.
KORIYA TA AREWA
Koriya ta Arewa ta sha alwashin harba wasu sabbin tauraron dan adam na leken asiri guda uku, da kera jiragen yaki marasa matuka, da kuma kara karfin makaman nukiliya a shekarar 2024 kamar yadda shugaba Kim Jong Un ya ce manufofin Amurka na sa yaki ya zama makawa, in ji kafar yada labaran kasar a ranar Lahadi.
JAMUS
Chancellor Olaf Scholz ya ce a cikin jawabinsa na karshen shekara na gargajiya cewa 2023 ta yi “wahala da zubar da jini sosai,” amma ya yi alkawarin “mu a Jamus za mu shawo kan wannan.”
BURTANIYA
London ta gabatar da sabuwar shekara tare da bongs na sanannen kararrawa na Big Ben, wasan wuta da nunin manyan labarai waɗanda ke nuna nadin sarautar Sarki Charles.
BRAZIL
Wani wasan wuta mai ban mamaki ya haska bakin tekun Copacabana na Rio de Janeiro inda kusan mutane miliyan biyu suka taru don maraba da shiga sabuwar shekara.
REUTERS/Ladan Nasidi.
