Kasuwar Hatsi Ta Kasa Da Kasa Ta Kano Ta Yi Fatali Da Jita-Jitar Da Ake Ta Yadawa Game Da Boye Abinci

Hukumar kula da kasuwar hatsi ta kasa da kasa ta Dawanau da ke jihar Kano a arewa maso yammacin Najeriya, ta yi watsi da rade-radin da ake yi na cewa dillalan da ke hada-hadar kasuwanci a kasuwar na boye kayan masarufi domin haifar da karancin su .

 

Dillalan sun kuma yi watsi da zarge-zargen da ake yi cewa, ‘yan kasuwar na kara farashin kayan abinci ba bisa ka’ida ba domin kawo wa ‘yan Najeriya wahala.

 

Da yake jawabi ga manema labarai a Kano, Shugaban kungiyar Raya Kasuwar Dawanau (DMDA), Alhaji Muttaka Isa ya bayyana cewa, dillalan hatsin suna sayen kayan abinci ne kawai daga hannun manoman da ke sassan kasar nan, inda suke ajiye su a rumbun ajiyar kasuwa kafin su sayar wa da su. abokan ciniki.

 

Ya ce, “Wadannan da sauran kayan abinci da kuke gani a cikin wadannan ma’ajiyar su ne kadai ake wucewa; dole ne a fara adana su kafin a sayar da su ga abokan cinikan mu.

 

Ajiye kayan a cikin rumbunan ajiya yana da mahimmanci domin hana su lalacewa saboda dalilai da suka dace. ”

 

Ina so in sanar da jama’a cewa gwamnatoci da kungiyoyi suna sayen hatsi daga gare mu.

 

Misali gwamnatin tarayyar Najeriya na sayan hatsi daga wajenmu, haka nan kungiyoyi irin su hukumar samar da abinci ta duniya (WFP) su ma suna sayen hatsi a wurinmu suna raba wa sansanonin ‘yan gudun hijira a Najeriya da sauran wurare.

 

Ina mamakin yadda waɗannan kwastomomi masu daraja za su iya saya daga gare mu idan muna tara waɗannan hatsi.”

 

Isa ya yi kira ga ‘yan Najeriya da su yi watsi da wannan jita-jita.

 

“Saboda haka, ina kira ga jama’a, musamman abokan kasuwancinmu, da su yi watsi da wannan mummunar jita-jita domin ba ta da tushe.

 

Gaskiyar ita ce, mu ’yan kasuwa ne na gaske masu kishin ci gaba da jin dadin abokan cinikinmu da kuma ci gaban tattalin arzikin kasarmu Nijeriya.” Shugaban ya kara da cewa.”

 

Dangane da batun karancin abinci, Shugaban kungiyar Raya Kasuwar Dawanau (DMDA), Alhaji Muttaka Isa ya bayyana rashin tsaro a matsayin babban dalilin rashin girbi.

 

Ya bukaci gwamnatin Najeriya da ta inganta tsaro da magance kalubalen sufuri ta hanyar tabbatar da ingantaccen hanyar sufurin jiragen kasa.

 

“Muna so mu yi amfani da wannan damar wajen yin kira ga gwamnatin Najeriya da ta shigo cikin wannan domin gyara da daidaita ayyukan da zasu samar da ingantacciyar hanya.

 

“Ya kamata a samar da daidaitaccen tsarin sufurin jirgin kasa don karya ginshikin tsadar sufuri da ake fuskanta ta hanyar jigilar kayayyaki ta hanya. Hakan zai inganta ayyukan tashohin busasshen ruwa da saukaka ayyukan kasuwa”.

 

Kasuwar hatsi ta kasa da kasa ta Dawanau ita ce mafi girma a yammacin Afirka da ke samar da kayan abinci ga kwastomomi a Najeriya, Nijar, Chadi, Kamaru da Jamhuriyar Afirka ta Tsakiya, da dai sauransu.

 

Kayayyakin abincin sun hada da shinkafa, gero, dawa, wake da gyada wadanda aka fi nomawa a sassan Arewacin Najeriya.

 

Kasuwar ta kuma hada da amfanin gona irin su Sobo, Ridi tsaba, Tsamiya da waken soya wadanda ake kaiwa kasashen Asiya, Turai da sauran kasuwannin duniya.

 

 

Ladan Nasidi.