Gwamnatin kasar Haiti ta kafa dokar ta baci ta sa’o’i 72 bayan wasu gungun ‘yan bindiga sun kai hari a babban gidan yarin Port-au-Prince, lamarin da ya yi sanadin kashe akalla mutane 12 tare da tserewa fursunoni kusan 4,000.
Shugabannin kungiyoyin sun ce suna son tilastawa Firaminista Ariel Henry murabus, wanda a halin yanzu yake kasar waje.
Kungiyoyin da ke da nufin kawar da shi suna iko da kusan kashi 80% na Port-au-Prince.
Rikicin gungun mutane ya yi sanadiyar mutuwar dubban mutane a kasar tun daga shekarar 2020.
Sanarwar da gwamnatin kasar ta fitar ta ce, a karshen mako ne aka afkawa gidajen yari guda biyu, daya a babban birnin kasar, dayan kuma dake kusa da Croix des Bouquets.
Ta ce ayyukan “rashin biyayya” barazana ne ga tsaron kasa kuma ta ce tana kafa dokar hana fita na dare a matsayin mayar da martani, wanda ya fara da karfe 20:00 na agogon gida (1:00 GMT a ranar Litinin).
Daga cikin wadanda ake tsare da su a Port-au-Prince har da ’yan kungiyar da ake tuhuma da hannu a kisan Shugaba Jovenel Moïse a shekarar 2021.
Kungiyar ‘yan sandan Haiti ta bukaci sojoji da su taimaka wajen karfafa babban gidan yari na Babban birnin kasar, amma an kai hari da yammacin ranar Asabar.
Tashe-tashen hankula sun yi kamari tun bayan kisan shugaba Moïse. Ba a maye gurbinsa ba kuma ba a yi zabe ba tun 2016.
A karkashin wata yarjejeniya ta siyasa, ya kamata a gudanar da zabuka kuma Henry wanda ba a zaba ya kamata ya sauka a ranar 7 ga Fabrairu, amma hakan bai faru ba.
BBC/Ladan Nasidi.
