Darakta, cibiyar al’adun kasar Sin da mai ba da shawara kan harkokin al’adu, ofishin jakadancin kasar Sin a Najeriya, Mista Yang Jianxing, ya jaddada bukatar zuba jari a fannonin yawon bude ido na Najeriya da kuma bunkasa kudaden shiga GDP da samar da ci gaba mai dorewa.
Mista Jianxing, ya yi wannan kiran ne a wajen taron karawa juna sani na yawon bude ido da karbar baki da kuma al’adu na Najeriya da Sin a shekarar 2024, a Abuja, babban birnin Najeriya.
Ya kuma ce, idan aka yi amfani da damar yawon bude ido yadda ya kamata, zai inganta da kuma haifar da ci gaban tattalin arziki.
“Nijeriya, a matsayinta na kasa mafi yawan al’umma a Afirka, tana da tarihi, kyawawan wurare masu ban sha’awa, da kadarorin al’adu na musamman kamar su kida, raye-raye, zane-zane, da tufafi. Yawon shakatawa na da babbar dama domin haifar da ci gaba, “in ji Yang.
A cewar manzon, yawon bude ido ba wai kawai yana taimakawa wajen bunkasar tattalin arziki ba, har ma yana inganta musayar al’adu da karfafa abokantaka na kasa da kasa.
“Ina fata karin ‘yan yawon bude ido na kasar Sin za su ziyarci Najeriya domin sanin al’adunta, fasaharta, da kyawunta,” in ji shi.
A cikin jawabin shi, darektan cibiyar bincike ta kasa da kasa, kwalejin yawon shakatawa ta kasar Sin, Mr. Yang Jinsong, ya jaddada nasarorin da kasar Sin ta samu a fannin yawon bude ido.
A cewar ma’aikatar al’adu da yawon bude ido ta kasar Sin, kasar Sin ta samu yawan masu yawon bude ido na gida biliyan 4.89, da masu yawon bude ido miliyan 87.63, da masu yawon bude ido miliyan 82.03 a shekarar 2023, tare da kara samun ci gaba a shekarar 2024.
Mr. Jinsong, ya kuma gabatar da wani ra’ayi na duniya wanda ya yi tsokaci kan rahoton Majalisar tafiye-tafiye da yawon bude ido ta duniya na shekarar 2022 wanda ya yi hasashen samun karuwar kashi 5.8% a kowace shekara ga masana’antar yawon bude ido ta duniya a cikin shekaru goma masu zuwa, wanda ya zarce adadin karuwar tattalin arzikin duniya da kashi 2.7%.
Shima da yake nasa jawabin babban daraktan, babbar kungiyar ‘yan kasuwan kasar Sin dake Najeriya, Dr Cui Guang-Zhen, ya jaddada kara zuba jari a fannin yawon bude ido, ta yadda za a samu karin masu zuba jari zuwa Najeriya, inda ya bayyana bambancin al’adun Najeriya.
“Tare da harsuna sama da 100, Najeriya na da wadatar albarkatun al’adu da yawon bude ido. Waƙoƙin Najeriya, masu ɗauke da taurarin duniya kamar Burna Boy da Wizkid, sun riga sun zama abin burgewa a duniya. Koyaya, ana buƙatar ƙarin saka hannun jari don yin amfani da damar yawon buɗe ido,” in ji shi.
Dr. Guang-Zhen, ya jaddada bukatar samar da ababen more rayuwa da kuma shirye-shiryen da aka yi niyya domin jawo hankalin masu ziyarar kasashen duniya.
A nasa bangaren, Babban Sakatare, Ma’aikatar , Al’adu, Yawon shakatawa, da Tattalin Arziki na Kirkira, Mista Raphael Obi, wanda ya samu wakilcin Blessing Ogar, ya lura cewa, bangaren yawon bude ido da karbar baki, na da ikon sauya tattalin arzikin kasashe.
“Wadannan masana’antu su ne ginshikan ci gaban tattalin arziki, rage rashin aikin yi da kuma baiwa al’ummomin da ba a yi musu hidima ba, musamman matasa da mata. Wannan taron karawa juna sani na samar da wani dandali a kan lokaci don yin musayar ra’ayoyi da karfafa hadin gwiwa da za su amfani kasashen biyu,” in ji shi.
Sauran abubuwan da suka fi daukar hankali a taron karawa juna sani, mai taken “Samar da yawon bude ido daga Najeriya da kasar Sin, da karbar baki, da kuma damar al’adu da hidimomi domin ci gaba mai dorewa”. Ya haɗa da: raye-raye daga kabilu daban-daban, Nunin abinci na al’adu da gabatar da kasida.
Ladan Nasidi.
