Ministan Kudi na Najeriya kuma Ministan Tattalin Arziki Wale Edun ya jaddada aniyar gwamnatin tarayya na samar da yanayi mai kyau na kasuwanci a Najeriya.
Edun ya jaddada wannan alkawari ne a ranar Juma’a a Abuja yayin ziyarar ban girma da tawagar kasar Turkiyya karkashin jagorancin Jakadan kasar a Najeriya Mista Hidayet Bayraktar ta kai masa.
Taron dai ya mayar da hankali ne kan karfafa alakar tattalin arziki da kuma lalubo hanyoyin zuba jari a tsakanin kasashen biyu inda ya jaddada kokarin Najeriya na inganta yanayin kasuwancinta ga masu zuba jari na cikin gida da na waje.
Ya ce taron wani muhimmin mataki ne na inganta harkokin kasuwanci da zuba jari a tsakanin kasashen biyu.
Ministan ya tabbatar wa tawagar cewa gwamnati za ta ci gaba da tallafawa ‘yan kasuwan kasashen waje domin karfafa alakar tattalin arziki.
Edun ya ce shugaban kasa Bola Tinubu ya jajirce wajen ganin an samu ci gaban tattalin arziki mai dorewa ta hanyar ajandar sabunta bege na gwamnatin sa.
A nasa jawabin Bayraktai ya yabawa ci gaban tattalin arzikin Najeriya tare da nuna godiya ga shugaban kasa kan kokarin da yake yi na samar da yanayi mai kyau na kasuwanci.
Ya ce za su kuma lalubo sabbin damammaki na inganta kasuwanci da zuba jari a tsakanin kasashen biyu.
Jakadan ya bayyana fatansa cewa taron zai taimaka wajen samar da ci gaba da wadata a Najeriya da Turkiyya.
Ladan Nasidi.
