Najeriya da kasar Isra’ila sun nuna sha’awar kafa wani kwamitin hadin gwiwa da zai karfafa tare da inganta dangantakar su.
Wannan dai na zuwa ne a daidai lokacin da Isra’ila ta bayyana shirinta na zurfafa kasuwanci da Najeriya tare da hada kai a fannonin tsaro da noma kiwon lafiya da ilimi da shirya fina-finai da dai sauransu.
An bayyana hakan ne a wata ganawa da jakadan Isra’ila a Najeriya kuma wakilin dindindin a kungiyar ECOWAS Michael Freeman, a ma’aikatar harkokin wajen kasar da ke Abuja babban birnin Najeriya.
Karamar ministar harkokin wajen Najeriya Ambasada Bianca Ojukwu ta jaddada cewa cudanya tsakanin jama’a da jama’a na sa huldar diflomasiyya mai inganci da sa ido ga kulla alaka a tsakanin kasashen biyu da kuma fadada iyakokin kasashen biyu.
Ambasada Ojukwu ta yaba wa wakilin da ya gabatar da shawarar tattaunawa mai zurfi a tsakanin kasashen biyu yana mai bada tabbacin cewa bangarorin biyu za su yi aiki kafada da kafada domin ganin an aiwatar da shi.
“Isra’ila ta yi suna a fannin tsaro da kuma yaki da ta’addanci. Muna sa ran daukar hakan fiye da dangantakar kasashen biyu. Za mu so Najeriya ta ci moriyar fasahar Isra’ila musamman a fannin samar da abinci. Ajandar Sabunta Fatan Shugaban Kasa Bola Ahmed Tinubu yana aiki tukuru don inganta rayuwar talakawa.
“Kasuwancin dala miliyan dari biyu da hamsin da ka ambata ba komai ba ne muna fatan masu zuba jarin mu za su zo Isra’ila don gano damar fitar da kayayyaki zuwa kasashen waje.
“Muna neman wani kwamitin hadin gwiwa da za mu yi amfani da shi wajen tuki da tantance alakar da ke tsakaninmu.
“Har ila yau muna fatan za a iya samun yarjejeniya tsakanin bangarorin biyu a fannin samar da Nollywood. Masana’antu ce mai nasara a Najeriya kuma muna son haɗin gwiwa a wannan fannin.”
Ojukwu ta bayyana cewa Najeriya na bayar da gudunmawa sosai ga harkokin yawon bude ido a kasar Isra’ila don haka ta yi kira ga ‘yan Najeriya da suka zauna a kasar tsawon shekaru biyar ba tare da samun bayanan laifuka ba da a ba su izinin zama dan kasa.
Ministan ta kuma jajanta wa Isra’ila game da harin da Hamas ta kai a ranar 7 ga Oktoba 2023 yana mai jaddada cewa hakan wani babban rashi ne ga bil’adama.
Ta bayyana fatanta na cewa bayan tsagaita bude wuta da aka yi a halin yanzu, za a daidaita zaman dar-dar tare da sako sauran wadanda aka yi garkuwa da su.
Da yake magana tun farko jakadan Isra’ila a Najeriya Freeman ya bayyana cewa Isra’ila da Najeriya na da tarihin diflomasiya mai ban sha’awa.
Ya taya ministar murna kan nadin da aka yi mata kwanan nan kuma ya ji dadin cewa zuwanta zai inganta alakar kasashen biyu.
Ladan Nasidi.
