Rundunar sojin Sudan ta bukaci goyon bayan diflomasiyya ga sabuwar gwamnatin da ta ce tana son kafawa bayan ta kwato babban birnin kasar Khartoum daga hannun dakarun da ke gaba da juna.
A cikin ‘yan makonnin da suka gabata sojojin Sudan na ci gaba da karbe iko da yankunan birnin da ke hannun dakarun Rapid Support Forces RSF a baya.
Shugaban rundunar sojin kasar Janar Abdel Fattah al-Burhan ya shaidawa taron ‘yan siyasa da ke marawa sojoji baya a karshen mako cewa zai kafa gwamnatin yaki ta “fasahar” tare da firaminista.
Ya dage cewa ba za a yi tattaunawa da RSF ba. Bangarorin biyu dai sun shafe shekaru biyu suna gwabzawa – rikicin da ya tilastawa mutane miliyan 12 barin gidajensu tare da barin wasu da dama cikin yunwa.
Janar Burhan ya kuma ce za a yi sabon kundin tsarin mulki kafin a kafa gwamnatin rikon kwarya.
“Za mu iya kiranta da gwamnatin rikon kwarya gwamnatin lokacin yaki amma gwamnati ce da za ta taimaka mana wajen kammala abin da ya rage na manufofin soji wanda ke ‘yantar da Sudan daga wadannan ‘yan tawaye,” in ji shi a ranar Asabar.
Sanarwar da ma’aikatar harkokin wajen kasar ta fitar a ranar Lahadin da ta gabata ta yi kira ga kasashen duniya musamman ma Majalisar Dinkin Duniya da kungiyar Tarayyar Afirka da kungiyar kasashen Larabawa da su goyi bayan taswirar da kasar ta gabatar a matsayin yarjejeniya ta kasa don samar da zaman lafiya da kwanciyar hankali da kuma kammala ayyukan mika mulki.
Sojoji da RSF wadanda a da suka yi aiki tare tun daga lokacin sun shiga wata muguwar gwagwarmayar mulki.
BBC/Ladan Nasidi.
