Shugaban Hukumar ECOWAS, Dokta Omar Touray, ya jaddada aniyar kungiyar na goyon bayan gwamnatin Habasha a kokarinta na samar da zaman lafiya, kwanciyar hankali, da ci gaba mai dorewa.
Dokta Touray ya bayyana cewa, tattaunawa da hadin gwiwa tsakanin yankuna na da matukar muhimmanci wajen tinkarar barazanar da kasashen duniya ke fuskanta da kuma ciyar da ajandar Tarayyar Afirka ta 2063 mai taken “Afirka da muke so.”
Ya bayyana hakan ne a lokacin da yake karbar bakuncin babban jakadan kasar Habasha a Najeriya, Ambasada Legesse Haile, wanda ya kai ziyarar ban girma ga hukumar ECOWAS a Abuja.
Taron ya ba da dama ga shugabannin biyu wajen yin musayar ra’ayi kan batutuwan da suka shafi moriyar juna, musamman harkokin siyasa da tsaro a kasar Habasha da ma babban yankin kahon Afirka.
Shugaban na ECOWAS ya jaddada cewa dorewar zaman lafiya da kwanciyar hankali a dukkan yankunan nahiyar na da matukar muhimmanci wajen cimma muradun hadin gwiwa na Afirka na hadewa da ci gaba da wadata.
“Zaman lafiya, tsaro, kwanciyar hankali, da hadewar yankin kahon Afirka da nahiyar Afirka na da matukar muhimmanci ga kungiyar ECOWAS. Na lura da yadda gwamnatin Habasha ta dora a kan shirinta na ci gaba da tattaunawa da kasashen da ke gabar ruwa.
Ya yaba da shirin samar da zaman lafiya, ci gaba, da sasantawa da kasar Habasha ke yi, yana mai jaddada shirin ECOWAS na karfafa hadin gwiwa da kasar Habasha, da kungiyar Tarayyar Afirka, da sauran al’ummomin tattalin arzikin yankin don inganta zaman lafiya, tsaro, da hadin gwiwar yanki a fadin Afirka.
Dr. Touray ya kuma taya gwamnatin kasar Habasha murnar nasarar kammalawa tare da kaddamar da madatsar ruwa ta Grand Ethiopian Renaissance Dam (GERD), yana mai bayyana shi a matsayin “wata babbar nasara da za ta bunkasa samar da wutar lantarki da kuma bunkasa ci gaban Habasha da kuma yankin kahon Afirka.”
Ya kuma kara da cewa, “Hakanan yana nuna cewa tare da kyawawan manufofi, zaman lafiya, da tsaro, sararin sama shine iyaka ga kasa, yanki, da kuma nahiyar.”
A nasa jawabin, jakadan Legesse Haile ya bayyana kokarin kasar Habasha wajen tabbatar da zaman lafiya, da karfafa hadin gwiwa a shiyyar, da bunkasa zamantakewa da tattalin arziki.
Ya yi nuni da cewa, kammala aikin babban madatsar ruwa ta Habasha—aikin samar da wutar lantarki mafi girma a nahiyar Afirka, ya nuna aniyar kasar na samun ci gaba tare da ci gaba da magance matsalolin da ke addabar magudanan ruwa ta hanyar tattaunawa.
Wakilin na Habasha ya kuma jaddada muhimmancin hadin kai da hadin gwiwa tsakanin kungiyoyin shiyya-shiyya na Afirka wajen tinkarar kalubale tare da zurfafa hadin kan nahiyar.
A karshen taron, shugabannin biyu sun bayyana kudurinsu na karfafa hadin gwiwa tsakanin ECOWAS da Habasha, a fannonin da suka shafi moriyar juna, musamman zaman lafiya da tsaro, da gudanar da mulki, da hadewar yankin.
Aisha. Yahaya, Lagos
