Gwamnatin tarayyar Najeriya ta jajantawa Jamhuriyar Angola bisa rasuwar tsohon mataimakin shugaban kasar, Fernando Santos.
Ministan harkokin wajen Najeriya, Ambasada Yusuf Tuggar a ranar Lahadi din da ya gabata ya bayyana ta’aziyyar a madadin gwamnatin tarayya a cikin wata sanarwa da Kimiebi Ebienfa, kakakin ma’aikatar harkokin wajen kasar ya fitar.
Tuggar ya ce, an karɓi mutuwar Santos da baƙin ciki sosai.
A cewarsa, “Nando,” kamar yadda ake kiransa da jin daɗi, fitaccen ɗan siyasa ne, gogaggen gwagwarmayar ‘yantar da Angola, kuma jigo a fagen siyasar Angola bayan samun ‘yancin kai.
“Jagorancinsa na tsawon rayuwarsa ga aikin gwamnati, wanda ya nuna matsayinsa na Mataimakin Minista, Firayim Minista, Mataimakin Shugaban kasa, da Shugaban Majalisar Dokoki ta kasa, ya taimaka wajen tsara Angola ta zamani, da kuma jagorantar kasar cikin mawuyacin lokaci na tarihinta.
“Nijeriya na cikin alhinin ‘yan uwanmu na Angola a wannan lokaci na rashin kasa.
“Marigayi Santos, ba wai kawai ginshikin zaman lafiyar Angola ba ne, har ma da murya mai mutuntawa a yankin Kudancin Afirka da ma nahiyar Afirka baki daya.
Tuggar ya ce “Jajircewarsa na hadin kan kasa, sulhu, da ci gaba yana da nasaba sosai da burinmu na samun zaman lafiya da ci gaba.”
Ministan ya mika sakon ta’aziyya ga shugaban kasar João Lourenço, da iyalan marigayin, da ‘yan uwa na kasar Angola, a madadin shugaba Bola Tinubu da ‘yan Najeriya baki daya.
Ya roki Allah Madaukakin Sarki ya ba wa ran Santos lafiya ya kuma baiwa duk wadanda suka yi alhinin rasuwarsa ta’aziyya.
NAN/Aisha.Yahaya, Lagos
