Gwamna Abba Kabir Yusuf na jihar Kano ya koma jam’iyyar All Progressives Congress (APC) a hukumance, inda ya kawo karshen cece-kucen da aka yi na tsawon makonni a kan batun sauya sheka zuwa jam’iyya mai mulki.
Komawar Gwamna Yusuf APC ya zo ne kwanaki uku bayan da ya fice daga jam’iyyar New Nigeria People’s Party (NNPP), saboda rikicin cikin gida da ya dabaibaye jam’iyyar.
Gwamnan ya yi rajista a hukumance a matsayin dan jam’iyyar APC a ranar Litinin din da ta gabata a dakin taro na Coronation da ke gidan gwamnati da ke Kano, a cikin tsauraran matakan tsaro da kuma zuwa da magoya bayan jam’iyyar suka yi.
Bayan rajistar sa, Yusuf ya kuma kaddamar da rajistar ta yanar gizo na mambobin APC a jihar, wanda tun da farko aka dakatar da shi da niyyar ficewa daga NNPP.
Da yake jawabi jim kadan bayan kammala rajistar gwamnan, ya ce ba wani buri ne ya sa ya yanke shawarar komawa APC ba.
“Shawarar da na yi na shiga jam’iyyar APC ba ta hanyar son rai ce ko kuma wani buri na siyasa ba,” in ji Yusuf.
“Wannan mataki ne da gangan da aka dauka domin tabbatar da hadin kai, zaman lafiya, kwanciyar hankali, da ci gaban jihar Kano mai dorewa.”
Ya bayyana cewa hada kan jihar Kano da jam’iyya mai mulki a matakin tarayya zai bude kofa ga bunkasa ayyukan raya kasa da kuma ribar dimokuradiyya. “Wannan matakin zai ba mu damar yin aiki kafada da kafada da Gwamnatin Tarayya tare da jawo ci gaba mai ma’ana da zai inganta rayuwar al’ummarmu,” in ji shi.
Gwamnan ya bukaci mazauna jihar da su goyi bayan shawarar da ya yanke tare da rungumar sabuwar alkiblar siyasa.
“Ina kira ga al’ummar jihar Kano nagari da su zo tare da ni a wannan sabuwar tafiya da za ta kawo zaman lafiya, hadin kai, kwanciyar hankali, ci gaba da kuma ci gaban jiharmu mai daraja,” in ji Yusuf.
Ya kuma bayyana godiya ga manyan masu ruwa da tsaki na jam’iyyar APC a jihar bisa rawar da suka taka wajen ganin ya dawo jam’iyyar.
“Ina so na mika godiya ga jagororinmu da masu ruwa da tsaki a jam’iyyar APC bisa goyon baya da jajircewar da suka bayar a tsawon wannan aiki,” in ji shi.
Manyan baki da suka halarci taron sun hada da tsohon shugaban jam’iyyar APC na kasa, Dakta Abdullahi Umar Ganduje; Mataimakin shugaban majalisar dattawa, Sanata Barau Jibrin; da kuma karamin ministan gidaje da raya birane, Yusuf Abdullahi Ata.
Sauran wadanda suka halarci taron sun hada da Sanata mai wakiltar Kano ta Kudu, Abdulrahman Kawu Sumaila;tsohon mataimakin gwamnan jihar Kano, Nasiru Yusuf Gawuna; da Shugaban jam’iyyar APC a jihar, Yarima Abdullahi Abbas.
Aisha. Yahaya, Lagos
