Najeriya Da Jamus Sun Rattaba Hannu kan Tallafin Yuro Miliyan 16.9m Saboda Aikin Lafiya

Gwamnatocin Najeriya da Jamus sun rattaba hannu kan tallafin Yuro miliyan 16.9 don aikin Lafiyar Haihuwa da Kamuwa da Cututtuka.

Karamin ministan kasafin kudi da tsare-tsare na kasa, Clem Agba, ya rattaba hannu a madadin gwamnatin Najeriya, yayin da bankin raya kasa na KFW da Marie Stopes International Organisation Nigeria, darektan kungiyar MSION, Emmanuel Ajah suka rattaba hannu a Jamus.

Ta hanyar wannan aiki, gwamnatin Jamus za ta tallafa wa Najeriya ta hanyar inganta rayuwar mata da ‘yan mata da kuma gaba dayan al’ummar Najeriya.

Agba ya bayyana cewa shirin ci gaban kasa na Najeriya 2021-2025 ya gano batutuwan mata a matsayin wani bangare na manyan manufofin inganta halaye masu kyau, kyawawan halaye da salon rayuwa a duk matakan rayuwa.

Ya ce, “aiwatar da aikin zai kara zurfafa tare da inganta hadin gwiwa tsakanin Najeriya da Jamus.”