Shugaba Buhari ya rantsar da sabbin sakatarorin dindindin guda shida

Shugaban Najeriya Muhammadu Buhari ya rantsar da sabbin sakatarorin dindindin guda shida da aka nada.

An gudanar da bikin rantsarwar ne a safiyar ranar Laraba a zauren majalisar da ke fadar shugaban kasa ta Villa, Abuja.

Wadanda aka rantsar sune; Adam Kambari daga jihar Borno, Esuabana Asanye, jihar Kuros Riba; Lamuwa Adamu Ibrahim, Jihar Gwambe; Yakubu Adamu, Jihar Kano; Oloruntola Micheal, Jihar Ogun; da Richard Pheelangwah, Jihar Taraba.

Bikin ya gudana ne gabanin taron mako-mako na Majalisar Zartaswa da ke gudana yanzu haka a zauren majalisar da ke fadar shugaban kasa ta Villa Abuja.

Wadanda suka halarci taron sun hada da sakataren gwamnatin tarayya Boss Mustapha; Shugabar ma’aikatan gwamnatin tarayya, Dr Folasade Yemi-Esan; da mai ba shugaban kasa shawara kan harkokin tsaro, Manjo Janar Babagana Monguno mai ritaya.

Sauran wadanda suka halarci taron sun hada da ministar kudi, kasafin kudi, da tsare-tsare ta kasa, Zainab Ahmed; Babban Lauya kuma Ministan Shari’a, Abubakar Malami; da na Babban Birnin Tarayya (FCT), Mohammed Musa Bello, da sauransu.

A zantawar ta da manema labarai na fadar gwamnatin jihar, shugabar ma’aikatan gwamnatin tarayya, Dakta Folashade Yemi-Esan ta bukaci sabbin sakatarorin dindindin da su bayar da dukkan gudunmawar su wajen gudanar da ayyukansu.