Nijar: Jamus za ta shiga aikin soja na EU

Majalisar dokokin Jamus ta ba da haske kan batun tura sojoji Nijar.

Sojojin Jamus 60 ne za su shiga tawagar Tarayyar Turai da aka kafa a watan Disambar da ya gabata da nufin taimakawa kasar wajen inganta kayan aiki da kayayyakin more rayuwa.

Matakin da majalisar dokokin kasar ta dauka a birnin Berlin na kara tabbatar da ci gaba da zaman Jamus a yankin Sahel duk da janyewar kasar daga Mali.

Nijar dai na fuskantar barazanar tashe-tashen hankula da ke kunno kai daga makwabciyarta Mali inda mayakan ke ci gaba da samun galaba bayan janyewar sojojin Faransa da na wasu kasashen Turai.