Hukumar Yaki Da Cin Hanci Da Rashawa Ta Kama Wasu Da Ake Zargi Da Damfarar Intanet A Jihar Kwara

Jami’an rundunar shiyyar Ilorin na hukumar yaki da masu yi wa tattalin arzikin kasa zagon kasa, EFCC, sun kama wasu mutane ashirin da ake zargi da aikata laifukan da suka shafi yanar gizo.

Hakan na zuwa ne a daidai lokacin da hukumar ta ninka kokarinta na dakile yawaitar laifukan da suka shafi zamba ta intanet musamman a tsakanin matasa a jihar Kwara.

Kamen dai shi ne karo na biyu da ake gudanar da irin wannan aiki cikin wata daya da ya gabata a Ilorin.

Idan ba a manta ba, a ranar 4 ga Mayu, 2023, jami’an hukumar yaki da cin hanci da rashawa EFCC reshen Ilorin, sun kama wasu mutane 62 da ake zargi da damfarar yanar gizo, ciki har da wani mai laifi, Raji Wasiu Babatunde, wanda hukumar ta samu a shekarar da ta gabata kan aikata irin wannan laifin. Kamen na baya-bayan nan, wanda ya biyo bayan sahihan bayanan sirri, an yi shi ne a Egbejila, titin filin jirgin sama da unguwar Offa Garage, duk a Ilorin.

Wadanda ake zargin sun hada da Habeeb Abubakar, Abiola Abiodun, Atitebi Samuel, Emmanuel Mofe Oborirhwoho, John Adamson, Mayowa Akinola Victor, Oluwafemi Smith Ola, Abdullahi Isiak, Orji Daniel Roland, Martinson Adegboyega da Kolawole Temidayo. Sauran sun hada da Orimadegun Bashir Ishola, Tijani Quadri, Adebisi Kazeem, Umar Abdulkareem, Adebisi Teslim, Okunlola Idris Ayomide, Quadri Lekan, Ukueni Great da Adeyeye Usman.

Kayayyakin da aka kwato daga hannunsu da aka kama sun hada da nau’ikan wayoyi daban-daban, kwamfutar tafi-da-gidanka da manyan motoci. A cewar sanarwar da hukumar ta fitar, za a gurfanar da wadanda ake zargin a gaban kuliya da zarar an kammala bincike.