Dubban Mutane Ne Suka Makale Yayin Da Sojojin Isra’ila Suka Kewaye Asibitin Al-Shifa

Sojojin Isra’ila sun rufe kofar gaba na babban asibitin Gaza, inda dubban mutanen da suka jikkata da matsugunansu suka makale a cikin mummunan harin bam da Isra’ila ke kaiwa.

Sojojin Isra’ila sun kewaye asibitin al-Shifa da sanyin safiyar ranar Asabar, tare da hana motocin daukar marasa lafiya shiga ko fita daga wurin, inda kayayyakin jinya da abinci ke yin kasala.

Tareq Abu Azzoum na Al Jazeera ya ce “Suna kai hari tare da lalata kofofin farko na babban rukunin likitocin a zirin Gaza yayin da marasa lafiya da dubban Falasdinawa ke ci gaba da zama a cikin farfajiyar wannan asibitin.”

“Wadannan mutanen suna cikin tarko a halin yanzu da sojojin Isra’ila suka jibge a sassa daban-daban da ke kewaye da wurin. Ba sa iya motsa motocin daukar marasa lafiya don kawo wadanda abin ya shafa da wadanda suka jikkata daga yankunan da aka kai harin. Mutane sun makale kuma ba su da abinci.”

Abu Azzoum ya ce maharba da manyan bindigogi na Isra’ila suma suna auna duk wanda ke tafiya a wajen asibitin.

Daraktan Al-Shifa Muhammad Abu Salmiya ya bayyana yankin da ke kusa da asibitin a matsayin “filin yaki”, amma ya ce ma’aikatan asibitin sun yi alkawarin ci gaba da kasancewa tare da marasa lafiya har zuwa “lokacin karshe”.

“Ba za mu tafi ba, saboda mun san idan muka bar asibiti, marasa lafiya da dama za su mutu,” Abu Salmiya ya fada wa Al Jazeera.

Hare-haren bam da ya ta’azzara na zuwa ne bayan wani harin da Isra’ila ta kai a asibitin al-Shifa da sanyin safiyar Juma’a, wanda ya yi sanadin mutuwar mutane akalla 13 tare da jikkata wasu da dama, a cewar ma’aikatar lafiya a yankin da ke karkashin ikon Hamas.

ALJAZEERA/Ladan Nasidi.