Najeriya Na Da Burin Daidaita Kudi Da Habaka Ci Gaba Tare Da Kawo Sauyi – Minista

Ministan yada labarai da wayar da kan jama’a na Najeriya Mohammed Idris ya ce gwamnatin shugaba Bola Ahmed Tinubu ta kuduri aniyar aiwatar da sauye-sauye a fannin tattalin arziki domin bunkasa ci gaban tattalin arziki, da dakile hauhawar farashin kayayyaki da kuma daidaita darajar kudin kasar.

Idris wanda ya yi jawabi a taron makon manema labarai na kungiyar ‘yan jarida reshen jihar Neja na shekarar 2024 a ranar Asabar din da ta gabata, ya ce shekarar na da bukatu da dama ga ‘yan Najeriya yayin da wasu tsare-tsare masu kyau na gwamnatin suka fara samun sakamako.

“Manufofin Shugaba Tinubu a karkashin shirin Renewed Hope Agenda suna da tushe mai karfi don ci gaban tattalin arzikin kasarmu, da kadarorinmu masu kima, da kuma tsaron kasa,” in ji shi, a cewar wata sanarwa daga ofishinsa.

Ministan wanda ya samu wakilcin Darakta Janar na Muryar Najeriya, Mallam Jibrin Baba Ndace, ya ce gwamnati za ta ci gaba da bin manyan manufofin tattalin arziki na ci gaba mai dorewa, rage hauhawar farashin kayayyaki, saukaka tsadar rayuwa, daidaita kudaden waje da samar da ayyukan yi.

Ya kuma ce gwamnati na nuna amana ga bin doka da oda da ‘yancin cibiyoyi, inda ya yi misali da hukuncin da kotu ta yanke a baya-bayan nan da ta tabbatar da hukuncin da ta yanke.

Idris ya bayyana cewa mayar da wasu sassan babban bankin Najeriya da hedikwatar hukumar kula da filayen tashi da saukar jiragen sama ta Najeriya zuwa Legas wani shiri ne na inganta yadda ake gudanar da aiki, da daidaita matakai da kuma tabbatar da tsarin kudi ga Najeriya.

Ya jaddada cewa matakin ba shi da wani dalili na siyasa kuma ya dace da mafi kyawun ayyuka na duniya.

Ministan ya ba da tabbacin cewa babu wata manufar gwamnati da za ta jefa wani yanki na kasar nan a cikin wani mawuyacin hali, inda ya kara da cewa kokarin da Tinubu ya yi na tabbatar da gaskiya da adalci yana bayyana a manufofinsa.

Ya kuma yi kira ga kafafen yada labarai da su marawa gwamnati baya wajen yakar labaran karya, wanda a cewarsa wata barazana ce da aka tsara da gangan domin bata labarin ‘yan Najeriya.

Ya sanar da cewa nan ba da dadewa ba gwamnati za ta fitar da cikakkun bayanai kan kundin tsarin martaba na kasa, wanda ke da nufin cusa kima a cikin ‘yan kasa.

Ladan Nasidi.