Shugaban Kasa Bola Ahmed Tinubu, ya bayyana matukar alhininsa dangane da rasuwar Imam Abdullahi Abubakar, babban limamin kauyen Nghar da ke karamar hukumar Barkin Ladi a jihar Filato, wanda wani abin ban mamaki na dan Adam da ya yi a rikicin kabilanci a shekarar 2018 ya sa ya samu karbuwa a kasa da ma duniya baki daya.
Imam Abubakar wanda ya rasu yana da shekaru 92 a duniya, ya yi fice ne bayan da ya bai wa kiristoci sama da 200 mafaka a masallaci da gidansa a sakamakon munanan hare-haren da aka kai a jihar Filato, lamarin da ake yi wa lakabi da daya daga cikin manyan alamomin hadin kai da jajircewa a Najeriya.
A cikin sakon ta’aziyyar da Kakakin Shugaban Kasa, Mista Bayo Onanuga ya fitar a ranar Juma’a, Shugaba Tinubu ya bayyana marigayi Imam a matsayin wani fitaccen shugaban addini wanda rayuwarsa ta misalta imani da jarumtaka da kuma imani da tsarkin rayuwar dan Adam.
Shugaban ya ce a daidai lokacin da ra’ayoyin kabilanci da addini ke barazanar mamaye hankali, Imam Abubakar ya tsaya kyam a bangaren zaman lafiya da tausayi da sanin yakamata.
“Tun da babban hadarin da ke tattare da rayuwarsa, babban malamin addinin ya zabi bil’adama akan rarrabuwar kawuna da soyayya akan kiyayya da runguma akan rashin aminta,” in ji Shugaba Tinubu.
“Ayyukansa na jarumtaka yana magana da ƙarfi fiye da kowace wa’azi, yana aika sako mai ƙarfi ga duniya game da ainihin bangaskiya.”
Shugaba Tinubu ya yi nuni da cewa irin jarumtakar Imam ba a sani ba, domin ya samu karramawa a cikin gida da waje saboda jajircewarsa na zaman lafiya a tsakanin mutane daban-daban.
Ya bukaci shuwagabannin addini da na al’umma a fadin kasar nan da su jajirce daga rayuwar Imam Abubakar ta hanyar karfafa juriya da mutunta juna da hadin kai.
Shugaban ya kara da cewa “Mai girma da daukaka ya baiwa Imam Abdullahi Abubakar hutu na dindindin, kuma ya saka masa da yawa bisa jajircewarsa da ayyukan alheri.”
