Hukumomin kasar sun ce adadin wadanda suka mutu sakamakon gobarar daji a kasar Chile ya kai akalla mutane 112, yayin da wasu daruruwa suka bace.
Shugaba Gabriel Boric a ranar Lahadi ya yi gargadin cewa hasarar rayuka za ta karu “muhimmanci” yayin da gobarar dajin ke ci gaba da ruruwa a yankin tsakiyar Valparaiso.
Boric ya ce a cikin wani jawabi da aka yi ta gidan talabijin, “muna ci gaba da shan wahala . “Muna fuskantar bala’i mai girman gaske.”
Hukumomin kasar sun ce an ba da rahoton bacewar mutane 200 a ciki da wajen birnin Viña del Mar, wani sanannen wurin shakatawa na bakin teku inda wasu mafi munin gobara ta tashi.
An lalata wasu unguwanni da dama da ke gefen gabashin birnin, wadanda suka yi fice wajen bikin kade-kade na kasa da kasa a duk shekara, sakamakon wutar da ta tashi, lamarin da ya sa mazauna yankin suka rika tono ragowar gidajensu da suka kone.
A ranar Juma’a Boric ya ayyana dokar ta baci yayin da ya yi alkawarin tallafawa mutanen da ke kokarin murmurewa daga bala’in.
“Muna tare, dukkanmu, muna yaki da gaggawa,” in ji shi. “Mafi fifiko shine ceton rayuka.”
Kusan hekta 26,000 (kadada 64,000) na fili ne aka kona a sassan tsakiya da kudancin kasar ta Latin Amurka har zuwa ranar Lahadin da ta gabata, a cewar hukumar bala’i ta kasa SENAPRED.
Kimanin jami’an kashe gobara 1,400 da sojoji 1,300 da kuma jirage masu saukar ungulu na kashe gobara 31 da jiragen sama, an tura su domin yakar gobarar a cewar hukumomi.
Gobarar daji ba bakon abu ba ce a kasar Chile a lokacin bazara kuma kimanin mutane 27 ne suka mutu sakamakon gobarar da ta tashi a yankin kudu da tsakiyar kasar a bara.
ALJAZEERA/Ladan Nasidi.
