Kungiyar Gwamnonin Najeriya, NGF, ta taya Shugaban Kasa Bola Ahmed Tinubu, da al’ummar Najeriya murnar cire kasar daga jerin sunayen masu fafutuka na Financial Action Task Force (FATF).
A wata wasika da shugaban kungiyar kuma Gwamnan Jihar Kwara, Malam Abdulrahman AbdulRazaq ya aika wa shugaban kasa, ya ce wannan gagarumin ci gaba na nuni ne a fili ga irin jagoranci mai hangen nesa da kuma jajircewar sa wajen karfafa shugabanci, gaskiya da rikon amana a cikin al’ummarmu.
A cewar wasikar, ta kuma bayyana tasirin ajandar sake fasalin da aka yi a karkashin gwamnatin Renewed Hope, wanda aka kafa a kan tsantsan kasafin kudi, yaki da cin hanci da rashawa, da kuma dawo da martabar Najeriya a duniya.
NGF ta ce “ficewar daga jerin masu launin toka na maido da amincewar kasashen duniya kan tsarin hada-hadar kudi na kasar da kuma karfafa ginshikin ci gaban hadaka, gudanar da mulki mai inganci, da kuma ci gaba mai dorewa a dukkan matakan gwamnati.”
Sanarwar ta kara da cewa, “Mai girma Gwamna, kungiyar NGF ta ci gaba da tsayawa tsayin daka wajen yin aiki tare da Gwamnatin Tarayya don karfafa wadannan nasarori, da tabbatar da ci gaba da bin ka’idojin duniya da gina tattalin arziki mai dorewa,” in ji sanarwar.
