Har yanzu Ukraine Na Iya Bai Wa Dakaru Kayan Abinci Da Albarusai A Bakhmut

Dakarun Ukraine da ke wajen birnin Bakhmut da ke gabashin kasar da aka yi wa luguden wuta, suna gudanar da aikin kiyaye rundunonin na Rasha, ta yadda za a iya kai harsashi, da abinci, da kayan aiki da magunguna ga masu tsaron gida.

“Muna gudanar da isar da kayan yaki, abinci, kayan aiki da magunguna zuwa Bakhmut. Muna kuma kokarin fitar da wadanda suka samu raunuka daga cikin birnin,” in ji kakakin rundunar Serhiy Cherevaty a tashar talabijin ta ICTV.

Ya ce ‘yan leken asirin na Ukraine da harbin bindigogi na taimakawa wajen bude wasu hanyoyin shiga cikin birnin.

Ya kara da cewa, tare da yin barna sosai, dakarun da ke goyon bayan Kyiv sun harbo jiragen Rasha marasa matuka guda biyu tare da lalata ma’ajiyar harsasai na abokan gaba a ranar Juma’a.

Hakanan Karanta: Yaƙin Ukraine: ICC ta ba da sammacin kama Putin

Rasha ta mayar da kame garin Bakhmut fifiko a dabarunta na karbe ikon yankin masana’antu na gabashin Donbas na Ukraine.

An lalata birnin sosai a cikin watannin da aka kwashe ana gwabzawa, inda Rasha ta kai hare-hare akai-akai.

A wani ikirari na baya-bayan nan da ta yi, Kyiv ta ce dakarunta sun kashe ‘yan kasar Rasha 193 tare da jikkata wasu 199 a yakin da aka yi ranar Juma’a.

A ranar Lahadin da ta gabata shugaban kasar Volodymyr Zelenskiy ya ce sojojin kasar Rasha sun yi asarar rayuka fiye da 1,100 a cikin kasa da mako guda da aka kwashe ana gwabzawa a Bakhmut da kewaye.