Jagoran ‘Yan Adawar Kenya Ya Gabatar Da Bukatar Tattaunawar Gyaran Zabe

Jagoran ‘yan adawar Kenya Raila Odinga ya yi kira ga jam’iyyun da ke wajen majalisar dokokin kasar da su shiga cikin tattaunawa kan sake fasalin zabe da kuma tsadar rayuwa, wanda ya yi hannun riga da shirin shugaba William Ruto na tattaunawar da za a yi a cikin majalisar dokoki kawai.

 

 

Odinga ya yi gargadin sake barkewar zanga-zangar matukar gwamnati ba ta dauki bukatun ‘yan adawa da muhimmanci ba.

 

 

A ranar Lahadin da ta gabata Odinga ya amince da tattaunawar da Ruto ya gabatar bayan da shugaban kasar ya bukace shi da ya dakatar da zanga-zangar da ta hada da ikirarin magudi a zaben shugaban kasar da aka gudanar a watan Agustan da ya gabata.

 

 

Dubban mutane ne suka halarci zanga-zangar adawa uku a cikin makonni biyun da suka gabata, wadanda suka rikide zuwa tashin hankali.

 

 

Masu sa ido na kasashen waje, ciki har da ofishin jakadancin Amurka a Kenya, sun bi sahun shugabannin cikin gida wajen maraba da tattaunawar don hana ci gaba da tabarbarewar tattalin arziki mafi girma a gabashin Afirka.

 

 

Odinga na son tattaunawa irin wadda ta kawo karshen tashin hankalin da ya biyo bayan zaben 2008, da kuma kafa gwamnatin hadin kan kasa.

“Don haka, gamayyar ta ba da shawarar wata tawagar da aka zana daga mukamanta a Majalisa da waje (majalisar),” in ji shi.

 

 

A ranar litinin, Ruto ya bukaci manyan ‘yan majalisar da ke kawance da su ba da fifiko ga korafe-korafen ‘yan adawa.

 

 

A wata ziyara da ya kai Kigali a ranar Talata, Ruto ya sake jaddada matsayinsa na tattaunawar da za a yi a cikin majalisar dokokin kasar “bisa tsarin bangaranci, kuma tayin da aka yi wa ‘yan adawa.” Ruto yayi magana a wani taron manema labarai, tare da shugaban kasar Rwanda Paul Kagame.

 

 

A taron manema labarai nasa, Odinga ya ce za a iya komawa zanga-zangar matukar ba a samu ci gaba kan bukatun ‘yan adawa ba, wanda ya hada da tantance zaben.

 

 

“Za mu koma ga mutane a farkon alamar rashin mahimmanci ta daya bangaren,” in ji shi.