Kungiyar ‘Yan Kasuwa ta Abuja ta taya Shugaba Tinubu murna

Shugaban kungiyar ‘yan kasuwa da masana’antu ta Abuja (ACCI), Dr Al-Mujtaba Abubakar ya taya shugaba Bola Tinubu murna bayan rantsar da shi a matsayin shugaban tarayyar Najeriya na 16.

Dr Abubakar ya bayyana cewa ana sa ran shugaban kasa gaba daya yana addu’ar Allah ya kara masa kwarin gwuiwa wajen gabatar da dukkan abubuwan da ya bayyana a jawabinsa na kaddamarwa a ranar Litinin.

Ya ce, “Tare da arziƙin da Shugaba Tinubu ya samu a fannin kasuwanci da siyasa, mun yi imanin cewa Najeriya za ta fuskanci sabon salo.”

Shugaban ACCI ya ce “Kamar yadda ake tsammani, Najeriya na jiran ta ga yadda sabuwar gwamnati za ta magance matsalolin tattalin arziki, tsaro, aikin yi da dai sauransu.”

Dokta Abubakar ya ce a yayin da kungiyar ‘yan kasuwa da masana’antu ke fatan samar da kyawawan manufofi da za su yi amfani ga ‘yan kasuwa ta yadda za su taimaka sosai wajen bunkasa tattalin arziki.

A cewarsa, “Muna fatan wannan gwamnatin za ta cika alkawuran da ta dauka a fannin tsaro, samar da ayyukan yi, samar da ababen more rayuwa, duk wani alkawari da sauran su.”

“Muna sake taya shugaban Najeriya na 16, Bola Ahmad Tinubu da mataimakinsa, Kashim Shettima murna,” Dr Abubakar ya kara da cewa.