Ranar Yawan Jama’a ta Duniya: Hukuma Ta Ce Najeriya Ce Ta Shida A Mafi Yawan Al’umma

Gabanin bikin Ranar Yawan Al’umma ta Duniya, Najeriya ta ce ta kuduri aniyar ganin an samu daidaiton jinsi tare da gudanar da sahihin kidayar yawan jama’a da gidaje na shekarar 2023 domin tsare-tsare da ci gaba a kasar.

Hukumar kula da yawan al’umma a Najeriya ta ce ta himmatu wajen samar da bayanai domin ci gaban kasa da ci gaban kasa kasancewar Najeriya na daya daga cikin kasashen da ke da saurin karuwar al’umma a duniya.

Shugaban Hukumar Kididdiga ta Kasa a Najeriya, Malam Nasir Kwarra ya ce “a halin yanzu al’ummar kasar sun haura miliyan 216, wanda hakan ya sanya Najeriya ta zama kasa ta shida mafi yawan al’umma a duniya.”

Mista Kwarra wanda ya bayyana hakan a taron tunawa da ranar yawan al’ummar duniya a Abuja babban birnin Najeriya, ya kara da cewa, “Najeriya na cikin jerin kasashe tara na duniya wadanda saurin karuwar al’ummarsu ya taimaka wajen kai biliyan 8 a ranar 15 ga Nuwamba, 2022.”

Ya kuma lura cewa “hasashen sun nuna cewa ana sa ran rabin karuwar al’ummar duniya daga yanzu zuwa 2050 za su fito ne daga yankin kudu da hamadar Sahara (SSA)”.

Hukumar ta ci gaba da cewa “Najeriya za ta kasance babban mai bayar da gudummawa ga ci gaban yankin da ci gaban da aka samu a baya.”

Ita ma a nata jawabin, wakiliyar asusun kula da yawan al’umma ta Majalisar Dinkin Duniya, UNFPA, Ms. Ulla Muller wadda ta yi magana a kan taken bana ta ja kunnen ‘yan Nijeriya game da kyautata rayuwar ‘ya’yan yarinyar da daidaiton jinsi.