Najeriya Da Jamhuriyyar Benin Tagwaye Ne – Shugaba Tinubu

Shugaban Najeriya, Bola Ahmed Tinubu, ya ce za a binciko hadin kan al’adu, tarihi da al’umma na Najeriya da Jamhuriyar Benin don amfanin ‘yan kasa.

Shugaba Tinubu, ya bayyana hakan ne a birnin Cotonou, babban birnin kasar Benin, a lokacin da yake amsa gayyatar da shugaban makwabciyar kasar, Patrice Talon, ya yi masa a matsayin babban bako na musamman a wajen bikin cikar jamhuriyar Benin shekaru 63 da samun ‘yancin kai a ranar Talata.

Ya yi nuni da cewa, kusancin kasashen biyu, kamanceceniya ta fuskar tattalin arziki da hangen nesa, ya sa ya zama wajibi a hada kai wajen cimma burin ci gaba, da daukaka al’umma, musamman matasa.

“Nijeriya da Jamhuriyar Benin tagwaye ne. An haɗa mu daga ciki ɗaya. A kowane fanni, mu daya ne kuma muna raba abubuwa da yawa iri daya, ”in ji shi, yayin wata tattaunawa da ‘yan jarida.

Shugaban ya ce, hangen nesa na siyasa da tattalin arzikin Najeriya da Benin ba zai iya tabbata ba sai ta hanyar aiki tare; tare da tabbatar da cewa za a karfafa hadin gwiwa da kuma bunkasa a matakai daban-daban.

Shugaban na Najeriya ya godewa Talon bisa wannan karramawa da kuma gayyatar wasu Gwamnonin Najeriya, wadanda suka halarci bikin. Gwamnonin sune: Ogun, Dapo Abiodun; Lagos, Babajide Sanwo-Olu; Oyo, Seyi Makinde; Kwara, AbdulRahman AbdulRasaq; Kebbi, Nasir Idris, Niger, Mohammed Umar Bago.

Babban Girmama

A nasa jawabin, shugaba Talon ya ce gayyata mai cike da tarihi na samun wani shugaba a bikin samun ‘yancin kai a kasar shi ne don nuna girmamawa ga shugaba Tinubu, biyo bayan nasarorin da ya samu na samar da shugabanci a Najeriya da kuma gabar tekun Yamma.

“Ina son in yaba wa Shugaba Tinubu bisa karrama mu ga gayyatar da muka yi masa na halartar bikin cikar mu shekaru 63. Shugaban na Benin ya kara da cewa, ba al’ada ba ce a gayyaci shugaban kasar waje don bikin ‘yancin kai, amma wannan yana nuna kyakkyawar alakar da muka samu, da karin fa’ida.”

Baya ga kan iyaka, Shugaba Talon ya lura cewa Najeriya da Benin sun zauna tare tsawon shekaru da yawa a matsayin iyali kuma ya kamata a karfafa kyakkyawar dangantaka tsakanin ‘yan kasa.

A ranar Talata ne shugaba Tinubu ya dawo Najeriya bayan bikin samun yancin kai.