Shugaban Sojojin Mali Da Shugaban Kasar Rasha Sun Tattauna Kan Juyin Mulkin Nijar

Shugaban sojojin Mali, Assimi Goita, ya bayyana cewa kwanan nan ya tattauna ta wayar tarho da shugaban kasar Rasha Vladimir Putin kan halin da ake ciki a Nijar.

Jamhuriyar Nijar dai ta fuskanci juyin mulkin da sojoji suka yi, lamarin da ya janyo damuwa a kasashen duniya.

A cikin wani sako da aka watsa a dandalin sada zumunta na X (tsohon Twitter), Goita ya bayyana cewa, Putin ya jaddada muhimmancin kudurin lumana don tabbatar da zaman lafiya a yankin Sahel.

Kasashen yammacin duniya na fargabar cewa Nijar na iya bin tafarkin Mali, inda a baya aka yi juyin mulkin da ya kai ga shigar sojojin haya na kungiyar Wagner ta Rasha a yunkurin da ake yi na yakar ‘yan tawaye.

Putin ya bukaci a maido da tsarin mulki a Nijar, a daya bangaren kuma shugaban kungiyar Wagner Yevgeny Prigozhin ya nuna goyon bayansa ga juyin mulkin.

Wani abin sha’awa dai shi ne, an samu gagarumin rinjaye na goyon bayan Rasha a Nijar tun bayan juyin mulkin da aka yi a jamhuriyar Nijar, inda magoya bayan gwamnatin mulkin sojan kasar suka daga tutocin kasar ta Rasha.

Africanews/Ladan Nasidi.