Amurka ba ta goyon bayan hare-hare a cikin Rasha – Jami’i

Amurka ba ta karfafa ko ba da damar kai hare-hare a cikin Rasha, in ji mai magana da yawun ma’aikatar harkokin wajen Amurka bayan da hukumomin Rasha suka ce sun kakkabo jirage marasa matuka da suka yi yunkurin kai hari Masko da sanyin safiyar Laraba.

Mai magana da yawun ma’aikatar harkokin wajen kasar ta Ukraine ya ce ya rage ga kasar Ukraine ta yadda za ta zabi kare kanta daga mamayar da Rasha ta yi a watan Fabrairun bara, inda ta kara da cewa Rasha za ta iya kawo karshen yakin a kowane lokaci ta hanyar ficewa daga Ukraine.

Hare-haren da jiragen yaki mara matuki ya kai a cikin kasar Rasha ya karu tun bayan da aka lalata wasu jiragen sama marasa matuka a fadar Kremlin a farkon watan Mayu.

Hare-haren da jiragen yaki marasa matuka a babban birnin kasar Rasha ya zama ruwan dare a ‘yan watannin nan.

Amurka wadda ta bai wa Yukren da gagarumin taimako ta fuskar makamai da sauran kayan aikin soji don yakar mamayar Rasha, a kullum ta ce ba ta goyon bayan kai hare-hare a cikin Rasha.

Ma’aikatar tsaron Rasha ta fada da sanyin safiyar Larabar nan cewa, na’urorin tsaron sama sun harbo jirage marasa matuka uku da suka yi yunkurin kai hari a birnin Masko.

Wani jirgi mara matuki ya afkawa wani gini da ake ginawa a tsakiyar birnin Moscow da sanyin safiyar Laraba, magajin garin Moscow Sergei Sobyanin ya fada a tasharsa ta Telegram, manhajar aika sako.

Filin jirgin saman Moscow sun dakatar da zirga-zirgar jiragen sama a safiyar Laraba, Kamfanin Dillancin Labarai na Rasha TASS ya ruwaito.

Manyan filayen tashi da saukar jiragen sama da ke kusa da babban birnin Rasha sun sha rufe don tashi da sauka a cikin ‘yan kwanakin nan saboda ayyukan jirage marasa matuka na Ukraine.

Kasar Rasha ta kuma harbo jiragen yakin Ukraine guda biyu a yankin Masko ba tare da an samu asarar rai ba, sannan ta sake saukar da wasu jiragen guda biyu a yankin Bryansk da ke kan iyaka da Ukraine, in ji ma’aikatar tsaron kasar.

Ukraine dai ba ta yi tsokaci kan wadanda ke kai hare-hare a yankin na Rasha ba amma da alama ta kara kai hare-hare tun bayan da aka lalata jirage marasa matuka biyu a fadar Kremlin a farkon watan Mayu.

Irin wadannan hare-haren sun kawo cikas ga tashin jirage na dan lokaci tare da haifar da kananan barna a gine-gine.

Ladan        Nasidi

REUTERS