Mutane 3,000 A Zamfara Sun Amfana Daga Aikin Tiyatar Ido Kyauta

Kimanin al’ummar jihar Zamfara 3000 ne suka ci gajiyar aikin tiyatar ido kyauta wanda dan majalisar wakilai na jam’iyyar APC a jihar Sahabi Ya’u ya dauki nauyin yi. Kwanan nan dan majalisar ya kaddamar da shirin wayar da kan marasa lafiya sama da 5,000.

KU KARANTA KUMA: Marasa galihu na jihar Zamfara sun amfana da ayyukan jinya kyauta

Shugaban tawagar ma’aikatan jinya Dr Kamal Umar ne ya bayyana haka a lokacin da yake zantawa da manema labarai a ranar Litinin a babban asibitin Kaura-Namoda da ke karamar hukumar Kaura-Namoda, wurin da aka gudanar da taron. Umar ya ce majinyatan ido 3,000, galibi masu shekaru masu rauni, mata da yara ne suka ci gajiyar jinya, tiyata da magunguna.

“An zabo wadanda suka amfana daga kananan hukumomin Kaura-Namoda, Birnin-Magaji, Shinkafi da Zurmi. Mun samar da tabarau, sufuri da ciyarwa kyauta ga majinyatan da aka yi musu magani daga kananan hukumomin hudu. Za mu mayar da wasu rikitattun lamuran kiwon lafiya da aka samu daga wayar da kan jama’a zuwa manyan cibiyoyin kiwon lafiya,” in ji Umar.

Babban jami’in wayar da kan jama’a, Alhaji Abba Isah, ya ce an dauki matakin ne domin tallafa wa marasa galihu da ke fama da matsalolin kiwon lafiya daban-daban da ba za su iya biyan kudin magani ba. Abba ya lura cewa an yi hakan ne da nufin rage wa jama’a nauyi a kan harkokin kiwon lafiya.

“Aikin wani bangare ne na tsoma bakin dan majalisar kan kalubalen tattalin arzikin da ake fuskanta a halin yanzu sakamakon cire tallafin mai. Sauran wadanda suka ci gajiyar shirin suma sun ci gajiyar aikin tiyatar hernia, hidimomin hakori, hauhawar jini da ayyukan ciwon suga da dai sauransu,” in ji shi.

Maimuna Kassim Tukur