Fitaccen dan takarar da zai kalubalanci shugaban Masar Abdel Fattah al-Sisi a zaben da aka shirya yi a watan Disamba ya sanar a ranar Juma’a cewa ba zai tsaya takara ba bayan ya kasa samun adadin kuri’un amincewar jama’a.
Domin tsayawa takara a zaben shugaban kasa, an bukaci ‘yan takara da su karbi goyon bayan jama’a 25,000 a fadin jihohi 15, ko kuma daga ‘yan majalisa 20 masu ci, kafin ranar 14 ga watan Oktoba.
Yakin neman zaben Ahmed el-Tantawy, tsohon dan majalisar dokokin kasar mai ra’ayin rikau, ya ce jami’ai da ‘yan daba masu goyon bayan gwamnati sun hana mutane da dama rajistar goyon bayansu ga takararsa yayin da jami’an tsaro suka kame dimbin magoya bayansa tare da hana shi gudanar da taron yakin neman zabe.
Hukumar zaben Masar ta ce irin wadannan zarge-zarge ba su da tushe balle makama.
Ko da yake ana sa ran Sisi zai yi nasara cikin sauki a watan Disamba, yakin neman zaben Tantawy ya tayar da hankulan jama’a saboda shi da magoya bayansa sun yi kokarin yin kamfen tare da taru a fili a kan tituna ta hanyar da ta zama ba a saba gani ba bayan an dauki tsawon lokaci ana murkushe ‘yan adawa a fagen siyasa.
Tantawy, wanda ke da mabiya miliyan 2 a Facebook, ya sami damar tattara amincewa 14,116, ciki har da 54 kawai a garinsa na Kafr El Shaikh.
“Ba za mu janye ba kuma ba mu janye ba, idan karfi ya rufe kofa, za mu bude kofofin bege da yawa, ku yi la’akari da maganata,” Tantawi ya fadawa magoya bayansa a Alkahira ranar Juma’a.
“Ni da kaina na san ‘ya’ya maza da mata da yawa na Masar wadanda suka fi ni cancanta kuma sun cancanta, amma shugaban na yanzu ba ya cikin su,” in ji shi.
An zabi Sisi tsohon hafsan soji ne a shekarar 2014 da 2018 da kashi 97% na kuri’un da aka kada. A shekarar 2019 an yi wa kundin tsarin mulkin kasar kwaskwarima domin ba shi damar tsayawa takara karo na uku.
Reuters/Ladan Nasidi.
Leave a Reply