Gwamnatin Najeriya Ta Kafa Asusun Magance Talauci

Taron Majalisar Zartaswa ta Tarayya ta amince da kafa asusun tallafi na jin kai da fatara.

Manufar ita ce samar da dala biliyan 5 a duk shekara don magance matsalolin jin kai na gaggawa.

Ministar Harkokin Jin-Kai da yaki da Fatara, Dr Betta Edu ce ta bayyana haka a lokacin da take zantawa da manema labarai a karshen taron majalisar da shugaba Bola Tinubu ya jagoranta a fadar shugaban kasa da ke Abuja ranar Litinin.

Ministan ya bayyana cewa za a fitar da kudaden ne ta hanyoyi daban-daban, da suka hada da kudaden gwamnati, gudumawa daga abokan hadin gwiwa, shigar da kamfanoni masu zaman kansu, da kuma gudunmawar daidaikun mutane.

Hanyar Samun Kudi

Edu ya ci gaba da cewa, wannan tsarin samar da kudade mai sassauci zai ba da damar mayar da martani cikin gaggawa game da rikice-rikicen jin kai a cikin kasar.

“Har ila yau, muna godiya ga shugaban kasa Bola Tinubu a yau bisa amincewar da aka bayar na samar da Asusun Tallafawa Talauci da Agajin Gaggawa.

“Wannan tsari ne mai sassaucin ra’ayi na kudade wanda zai iya taimaka mana samun gudummawa daga sassa daban-daban. Don haka za mu samu gudummawa daga gwamnati, daga kamfanoni masu zaman kansu, abokan ci gaba, daidaikun mutane, masu hannu da shuni, da sauran sabbin hanyoyin samar da kudade da tara kudade tare. Wannan shi ne don ba da damar kai daukin gaggawa ga matsalar jin kai a Najeriya.” Ministan ya ce.

Yace; “Kowace rana muna jin labarin rikicin, ambaliyar ruwa, da sauran su. Muna bukatar mu iya mayar da martani mai inganci a matsayinmu na kasa. Bayan wannan, batun rage radadin talauci na daya daga cikin ajandar shugaban kasa Bola Ahmed Tinubu a cikin ajandarsa guda 8 kuma muna son mu iya tunkarar lamarin.

“Kowace shekara muna fatan samun damar tara akalla dala biliyan 5 a cikin wannan asusun kuma wannan yana fitowa daga wurare daban-daban da na ambata da ma fiye da haka. Muna fatan idan aka samar da wannan kudade, za mu iya zama da dukkan masu ruwa da tsaki, ciki har da sauran ma’aikatu, kuma a zahiri za mu fitar da cikakken tsarin aiwatar da shi a Najeriya.”