𝗚𝗪𝗔𝗠𝗡𝗔𝗡 𝗞𝗔𝗡𝗢 𝗬𝗔 𝗧𝗔𝗬𝗔 𝗠𝗨𝗥𝗡𝗔 𝗚𝗔 𝗗𝗜𝗚 𝗗𝗔𝗦𝗨𝗞𝗜 𝗚𝗔𝗟𝗔𝗗𝗔𝗡𝗖𝗛𝗜 𝗕𝗔𝗬𝗔𝗡 𝗦𝗔𝗠𝗨𝗡 𝗞𝗔𝗥𝗜𝗡 𝗚𝗜𝗥𝗠𝗔

Gwamnan jihar Kano Arewa maso Yamacin Najeriya, Alhaji Abba Kabir Yusuf ya taya murna ga Dasuki Galadanchi bayan kara samun girma da yayi zuwa matakin Mataimakin Sifeto Janar na ‘Yansandan Najeriya (DIG), mukamin da rundunar ‘yansandan na Najeriya ta bashi don wakiltar yankin Arewa maso Yammacin Najeriya.

A wasika dauke da sa hannun daraktan yada labaran gwamnan Sunusi Bature Dawakin Tofa gwamnan a lokacin da yake taya Sifeto Janar na ‘yansandan na Najeriya sanya lambar karin girman a kafadar sabon mataimakin sifeton ‘yansandan a shelkwatar ‘yansandan Najeriya da ke Abuja ya bayyana shi a matsayin dansanda da yayi aiki tukuru ga kasarsa har zuwa wannan lokaci.

Gwamnan cikin alfahari ya bayyana sabon mataimakin sifeton ‘yansandan Galadanchi a matsayin zakakuri da yayi aiki a matakai daban-daban na aikin dansanda wajen kare rayuka da dukiyoyin al’ummar Najeriya.

Gwamna Abba Kabir Yusuf a madadin gwamnati da al’ummar jihar Kano ya mika sakon taya murna ga danasalin jihar ta Kano tare da yi masa addu’ar Allah Ya yi riko da hannunsa a duk ayyukan da zai yi.

DIG Dasuki Galandanchi dan aasalin jihar ta Kano ne wanda ya rike kujerar mataimaki na sifeton ‘yansanda matakin AIG mai kula da shiya ta 12 a jihar Bauchi kafin daga martabatarsa zuwa wannan mataki na DIG da hukumar kula da ‘yansanda ta kasa ta amince a ranar 24 ga watan Janairu, 2024.

Yusuf Bala.