Sabon Shugaban Hukumar Zabe Mai Zaman Kanta ta Kasa (INEC), Farfesa Joash Amupitan (SAN) da aka rantsar, ya yi alkawarin kare kundin tsarin mulki da kuma tabbatar da sahihancin tsarin zaben Najeriya, inda ya sha alwashin gudanar da zabe cikin gaskiya da adalci.
Da yake jawabi jim kadan bayan rantsar da shi a fadar gwamnati da ke Abuja, Farfesa Amupitan ya tabbatar da aniyarsa ta kare martabar dimokuradiyyar kasar, yana mai jaddada cewa hukumar da ke karkashinsa ba za ta yi kasa a gwiwa ba kan ka’idojin zabe ko tanadin doka da ke jagorantar gudanar da tsarin.
“Don haka zan sake tabbatar da abin da na dauka a baya, na cewa zan kare kundin tsarin mulki da dokokin Tarayyar Najeriya dangane da tsarin zabe, kuma kamar yadda shugaban kasar ya ce, an ba ni tuhume-tuhume na tabbatar da sahihin zabe, gaskiya da adalci.”
Ya kuma tabbatar wa ‘yan Nijeriya cewa INEC za ta karfafa tsarinta na cikin gida, da inganta ayyukanta, da kuma nuna adalci ba tare da kakkautawa ba a duk zabukan da za a yi nan gaba.
Farfesa Amupitan ya bayyana cewa, hukumar ba za ta iya gudanar da sahihin zabe ba kadai, yana mai jaddada muhimmiyar rawar da masu ruwa da tsaki ke takawa, wadanda suka hada da ‘yan siyasa, hukumomin tsaro, kungiyoyin farar hula, kafafen yada labarai, da kuma masu zabe.
Ya ce, “Komai girman matakin da muka sanya na samun nasara, har yanzu za mu bukaci hadin kan masu ruwa da tsaki don cimma hakan,” in ji shi, inda ya yi alkawarin tuntubar juna da ci gaba a matsayin wani bangare na dabarunsa na garambawul.
Kalaman na Farfesa Amupitan ya biyo bayan zargin da shugaba Tinubu ya yi ne tun da farko, inda ya bukaci sabon shugaban hukumar ta INEC da ya kiyaye sahihancin zabe, da karfafa amincewar jama’a ga hukumar, da kuma karfafa cibiyoyin dimokuradiyyar kasa.
