Amurka Ta Kakabawa Dan Shugaban Zimbabwe Takunkumi

Amurka ta kakabawa wasu ‘yan kasar Zimbabwe hudu takunkumin tattalin arziki da suka hada da dan shugaban kasar Emmerson Mnangagwa.

Tana zargin Emmerson Mnangagwa Junior da alaka da hamshakin dan kasuwar, Kudakwashe Tagwirei, wanda tuni Amurka ta kakabawa takunkumin da ake masa na cin hanci da rashawa.

Ma’aikatar Baitulmali ta ce a cikin shekaru biyar da suka gabata, Mista Tagwirei ya yi amfani da hada-hadar kasuwanci da ba ta da tushe da kuma dangantakarsa da shugaban kasa wajen bunkasa daular kasuwancinsa sosai da kuma tarar miliyoyin daloli.

A halin da ake ciki kuma, tuni shugaba Mnangagwa ke karkashin takunkumin Amurka.

A cikin wata sanarwa da ma’aikatar kudin kasar ta fitar, ta bukaci gwamnatin kasar ta Zimbabwe da ta magance abin da ta kira musabbabin matsalolin da ke addabar kasar, ciki har da masu cin hanci da rashawa na cin zarafin hukumomi don amfanin kansu.