Kotun Kolin Angola Za Ta Karbe Kadarorin Isabel Dos Santos

Kotun kolin Angola ta bayar da umarnin a kwace kadarorin Isabel dos Santos, diyar tsohon shugaban kasar, Eduardo dos Santos da ya rasu a bara.

Wannan shine karo na biyu da kwace kadarorin Isabel dos Santos a Angola tun shekarar 2019.

Hukuncin kotun ya shafi kashi 100 na hannun jarin kamfanin Embalvidro, wanda ake tuhuma ya kasance mai amfani da ma’auni na dukkan asusun ajiyar banki na diyar tsohon shugaban Angola.

Hakanan an haɗa da hannun jarin Isabel dos Santos a cikin kanfanin sadarwar wayar hannu a Mozambique, Cape Verde da São Tomé e Principe.

Wannan ya hada da kashi 70% na hannun jarin kamfanin sadarwa na Mozambik MSTAR, wanda Isabel dos Santos ita ce ta fi cin gajiyar sa, haka kuma an kwace kashi 100% na kamfanonin UNITEL T+ da ke Cape Verde da UNITEL STP a São Tomé e Principe.

A cewar Kotun Koli, ‘yar kasuwan ta wawure makudan kudade a kasar Angola na fiye da Yuro biliyan 1, “a cikin wasu laifuka” tare da shaidar “wasu almubazzaranci, cin hanci da rashawa, shiga harkokin tattalin arziki a kamfanoni da kuma satar kudi”.

Kotun kolin Angola ta yanke hukuncin ne bisa wasu takardu daga kamfanin mai na kasar Sonangol da kamfanin wayar salula Unitel, da kuma bayanan da hukumomin Portugal da Holland suka bayar.