Afganistan da China zasu Sanya Hannu Kan Yarjejeniyar Farko Tun Zuwar Taliban

Gwamnatin Taliban ta Afganistan za ta rattaba hannu kan yarjejeniyar hako makamashi ta farko ta shekaru 25 da wani kamfani na kasar China tun bayan da kungiyar Taliban ta karbe iko da Afghanistan a shekarar 2021.

Kakakin kungiyar Taliban Zabihullah Mujahid ya ce yarjejeniyar hako mai za ta sa kamfanin mai da iskar gas na Xinjiang ta Tsakiyar Asiya (CAPEIC) ya yi aikin hako mai a yankin arewacin tekun Amu Darya.

Domin tabbatar da tsaron ‘yan kasar ta China, jami’an Taliban sun kara da cewa a ranar Alhamis din da ta gabata, jami’an tsaro sun kai hari kan mayakan kungiyar IS da suka kai hari a wani otel da ‘yan kasuwar kasar Sin ke amfani da su.

“An kashe mayakan IS takwas, kuma an kama wasu da dama. Harin na watan Disamba a otal din Longan da ke birnin Kabul ya kashe akalla mutane uku tare da jikkata wasu 18, ciki har da ‘yan kasar China biyar,” in ji jami’an Taliban.

Jakadan kasar Sin a Afganistan Wang Yu ya shaidawa taron manema labarai a Kabul babban birnin kasar cewa, kwangilar mai na Amu Darya wani muhimmin aiki ne tsakanin Sin da Afghanistan.

Har ila yau, wani kamfani mallakar gwamnatin kasar Sin yana tattaunawa kan aikin hakar ma’adinin tagulla a gabashin kasar. An kiyasta cewa Afghanistan na zaune kan albarkatun kasa – wadanda suka hada da iskar gas, tagulla, da tarin kasa da ba kasafai ba – wanda darajarsu ta haura dala tiriliyan 1.

Duk da haka, yawancin wannan ajiyar ba a yi amfani da su ba saboda rikice-rikice na shekaru da yawa a kasar. Beijing ba ta amince da gwamnatin Taliban ta Afghanistan a hukumance ba. Duk da haka, tana da muhimmiyar moriya a cikin kasar, wanda ke tsakiyar yankin da ke da muhimmanci ga shirin Belt and Road Initiative na kasar Sin (BRI).

Shirin na BRI, wanda Xi Jinping ya kaddamar a shekarar 2013, ya samar da kudade ga kasashe masu tasowa don gina ababen more rayuwa kamar tashoshin jiragen ruwa, tituna, da gadoji.