Gwamnan jihar Ondo ya yabawa tsarin zabe na Hukumar Zabe Mai Zaman Kanta kan sabon tsarin amfani da na’ura mai kwakwalwa ta Zamani

Gwamnan jihar Ondo, Rotimi Akeredolu, ya yabawa hukumar zabe mai zaman kanta ta kasa INEC bisa bullo da tsarin tantance masu kada kuri’a, wato BVAS.

Gwamna Akeredolu ya ce da wannan sabuwar fasahar, “ba zai yiwu ba a sake yin magudin zabe a Najeriya.”

Gwamnan yana magana ne a lokacin da ya karbi bakuncin kwamishinan zabe na jihar, Dr Rufus Akeju.

Ya ce, “Na yi farin ciki da cewa yana kara wahala ga wani ya rinjayi INEC wajen yin magudin zabe. Na shiga zabe da yawa kuma ina gaya wa mutane cewa zabe yana da wuya a yi magudi.

“Yanzu ya kara zama mai wahala, domin ko muna so ko ba mu so, INEC ta kara inganta ayyukanta a kan lokaci, kuma ina so in taya ku (Akeju) da shugaban kasa murnar wannan kyakkyawan aiki da kuke yi.”

Gwamna Akeredolu ya kuma yabawa REC mai ritaya saboda babu wani zabe da bai kammala ba a lokacin da yake jihar.

Ya bukaci INEC da ta nemo hanyar da za ta kara wa PVC din kima baya ga yadda ake amfani da ita wajen kada kuri’a, domin ta kara kayatar da jama’a.

Kwamishinan zabe mai barin gado, Rufus Akeju ya godewa gwamnatin jihar Ondo da mazauna jihar bisa goyon baya da hadin kai da suka ba shi a zamaninsa.