Firaministan Mali ya yi Allah-wadai da takunkumin da Amurka ta kakaba wa Wagner

Firayim Ministan Mali Choguel Kokalla Maiga ya yi Allah wadai da takunkumin da Amurka ta kakabawa ministan tsaro, babban hafsan sojin sama da mataimakin shi a matsayin “daukar hankali” tare da yin alkawarin ba da cikakken goyon baya ga jami’an gwamnatin mulkin soja.

“Takunkumin da aka sanya wa jiga-jigan jami’an mu, Ministan Tsaro, Kanar Sadio Camara, Janar Alou Boi Diarra, Kanar Adama Bagayoko, ba shi da wata manufa face karkatar da al’ummar Mali. Babu wani abu da zai dauke hankalinmu daga aikin sake gina kasar Mali,” Mista Maiga ya wallafa a shafinsa na Twitter.

Baitul malin Amurka ta kakaba takunkumi kan mutanen uku saboda “sauƙaƙe” faɗaɗa rukunin Wagner na Rasha a Mali.

Ana zargin dakarun Wagner da aikata ta’asa tare da sojojin Mali a yakin da suke yi da ‘yan jihadi, inda Amurka ta ce yawan fararen hular da suka rasa rayukansu ya ninka fiye da sau uku tun bayan da aka tura su a karshen shekarar 2021.

Firaministan shi ne kadai babban jami’i a gwamnatin mulkin soja da ya yi tsokaci kan takunkumin.

Martanin da aka auna na Mali ya zuwa yanzu ya sha bamban da kalaman da ake yi da kuma zargin makircin da ake yi na kawo cikas ga gwamnatin mulkin da mai magana da yawun gwamnatin, Kanar Abdoulaye Maiga ya gabatar a cikin jerin gwanon diflomasiyya a baya, musamman ma Faransa da Majalisar Dinkin Duniya.

L.N