Shugaba Tinubu Ya Isa Kasar Saudiyya

Shugaban Kasa, Bola Ahmed Tinubu ya isa Birnin Riyadh, Kasar Saudi Arabia domin halartar Taron Kolin Saudiyya da Afirka.

A ranar Alhamis ne Shugaba Tinubu ya tashi daga Abuja zuwa birnin Riyadh na kasar Saudiyya, inda ake sa ran zai halarci taron koli na Saudiyya da Afirka da za a yi a Riyadh a ranar 10 ga Nuwamba, 2023.

A yayin taron Saudiyya da Afirka, shugaban na Najeriya zai bayyana himmar da Najeriya ta yi wajen jawo hankalin masu zuba jari kai tsaye daga kasashen waje da kuma inganta hadin gwiwar kasuwanci, tare da goyon bayan sauye-sauyen tattalin arziki da gwamnatinsa ke aiwatarwa.

Mai ba Shugaban Kasa Shawara na Musamman Kan Harkokin Yada Labarai Ajuri Ngelale, tun da farko ya bayyana cewa, tattaunawa a taron farko na Saudiyya da Afirka, za ta shafi tallafawa ayyukan hadin gwiwa, da inganta daidaiton siyasa, da magance barazanar tsaro a yankin, da saukaka sauye-sauyen tattalin arziki ta hanyar bincike da ci gaban gida. sabbin hanyoyin samar da makamashi yayin da suke karfafa hadin gwiwar zuba jari a bangarori daban-daban.

A cikin tawagar Shugaban Kasa akwai Ministan Harkokin Waje, Amb. Yusuf Tuggar; Ministan Ilimi, Farfesa Tahir Mamman; Ministan tattalin arziki kuma ministan kudi, Wale Edun; Ministar Harkokin Agaji da Rage Talauci, Dr. Betta Edu; da kuma Ministan Kasafin Kudi da Tsare-tsare na Tattalin Arziki Sen. Abubakar Bagudu.